У Мінску прадаюць аднушку за 145 тысяч даляраў. Рамонт узнялі на смех
Уся кватэра выкладзена пліткай.
У Мінску ў ЖК «Паўночны бераг» (вуліца Віталя Цвірко, 102) прадаюць аднапакаёвую кватэру.
Агульная плошча — 44,7 м², жылая — 39,7 м². Просяць ажно 145 тысяч даляраў. Гэта пры тым, што ў кватэры незакончаны рамонт.
У апартаментах свабодная планіроўка, два акны ў падлогу. Пяты паверх (усяго ў доме сем паверхаў). Праведзена новая электрыка з «Разумным домам», пастаўлены кандыцыянер.
Але найбольшую ўвагу ў сацсетках прыцягнула падлога з керамаграніту — уся кватэра выкладзена пліткай.
Людзі жартуюць, што гэта выглядае як пахавальны дом і недзе павінен быць пакой з Леніным.
«А на столь не хапіла пліткі?» — іранізуюць.
«Дэмантаж пліткі ўваходзіць у кошт?»
«Здаецца, прычына продажу зразумелая».