Уіткаф настойліва папрасіў Расію не дапамагаць Ірану разведданымі

Спецыяльны пасланнік прэзідэнта ЗША Дональда Трампа Стывен Уіткаф звярнуўся да Расіі з просьбай не перадаваць Ірану разведвальныя звесткі, якія могуць выкарыстоўвацца для ўдараў па амерыканскіх вайскоўцах. Пра гэта ён паведаміў журналістам на борце прэзідэнцкага самалёта ў ноч на 8 сакавіка. Уіткаф падкрэсліў, што выказаў гэтую просьбу вельмі настойліва, аднак падрабязнасцяў размовы раскрываць не стаў, паведамляе The Moscow Times.

Стыў Уіткаф. Фота: Ludovic Marin / Pool photo via AP

Сам Дональд Трамп, каментуючы магчымую дапамогу Расіі Ірану, сказаў, што не ведае, ці ёсць у ЗША доказы такога супрацоўніцтва. Пры гэтым ён заявіў, што нават калі інфармацыя і перадаецца, яна не прыносіць Ірану істотнай карысці. Трамп адзначыў, што пасля падзей апошняга тыдня вайсковы патэнцыял Ірана значна аслаблены. Ён таксама дадаў, што ўзброеныя сілы ЗША з’яўляюцца самымі моцнымі ў свеце.

Раней у амерыканскіх СМІ з’явілася інфармацыя са спасылкай на крыніцы, што Расія нібыта перадае Ірану звесткі пра месцазнаходжанне і перамяшчэнне амерыканскіх войскаў, караблёў і самалётаў. У Белым доме заявілі, што нават калі такая дапамога і мае месца, яна не з’яўляецца вырашальнай і не павінна паўплываць на перамовы ва ўкраінскім пытанні. Падобную пазіцыю выказаў і кіраўнік Пентагона Піт Хегсэт, адзначыўшы, што меркаваная падтрымка Ірана з боку Расіі не выклікае асаблівай заклапочанасці ў Вашынгтоне.

Каментары да артыкула