У Беларусі здымуць серыял аб праблемах у сем'ях сілавікоў у 2020 годзе
«Сцэнарый прабівае на слязу», — запэўнівае міністр унутраных спраў Іван Кубракоў.
У Беларусі рыхтуюцца да здымак маштабнага прапагандысцкага серыяла, які павінен стаць падарункам да 110‑годдзя міліцыі. Міністр унутраных спраў Іван Кубракоў анансаваў 24 серыі, піша Sputnik.
«Мы ўнеслі прапанову, я спадзяюся, што ў нас атрымаецца, бо аб'ём працы вельмі вялікі. Пачынаюцца ў гэтым годзе здымкі мастацкага фільма, прысвечанага беларускай міліцыі, 24 серыі на 3 сезоны. Фільм будзе называцца «Слова афіцэра». Ён будзе прысвечаны дынастыям беларускіх міліцыянераў, пачынаючы з 1941 года і па 2020-ы», — сказаў Кубракоў.
Паводле яго слоў, у цяперашні час ідзе праца над сцэнарыем, у серыяле пакажуць жыццё міліцыянераў і іх сем'яў. Па словах Кубракова, ужо гатовы сцэнарый для чатырох серый, атрымліваецца «жыццёва».
Шматсерыйны фільм павінен ахапіць вялікі перыяд, пачынаючы з 1941 года. У тым ліку ў серыяле будзе паказаны і 2020 год і тыя пытанні, якія «ўзнікалі ў сем'ях праваахоўнікаў на фоне выканання імі свайго службовага абавязку».
Кубракоў дадаў, што серыял павінен атрымацца цікавым, а сцэнарый «прабівае на слязу».
Прэм'ера запланавана на 4 сакавіка 2027 года — у дзень 110‑годдзя міліцыі.