Ксенія Сітнік стала мамай

Пераможца дзіцячага «Еўрабачання-2005» Ксенія Сітнік паведаміла ў інстаграме, што месяц таму нарадзіла дзіця.

Скрыншот з відэа

«Роўна месяц таму, у лютаўскую пятніцу трынаццатага, з мяне літаральна выйшаў выдатны чалавек. І як пісаў класік: гэта быў цудоўны час, гэта быў жахлівы час. Такога сінтэзу агоніі, жывёльнага страху, кранальнай любові і ўдзячнасці ў адным пункце рэальнасці раней адчуваць не даводзілася. Падобна на тое, менавіта гэта і называецца — living my life like it’s golden», напісала Ксенія Сітнік.

Да допісу яна прыклала даволі смелае сваё відэа ў апошні перыяд цяжарнасці. Падрабязнасцяў пра дзіця яна ніякіх не дала, нават не згадала пра ягоны пол.

Нагадаем: у навагоднюю ноч Ксенія Сітнік прадэманстравала ў інстаграме шматзначнае фота — тады яна намякала на тое, што атрымала прапанову рукі і сэрца. Але здымкі ў яе падборцы былі зроблены раней.

Пасля Ксенія падагравала цікавасць падпісчыкаў тым, што публікавала размытыя відэа, на якіх яна ў белай (імаверна, вясельнай) сукенцы. Аўтаркай відэа стала яе сяброўка — першая прадстаўніца Беларусі на дзіцячым «Еўрабачанні» Вольга Сацюк.

Хто ж абраннік беларускай зоркі? Яна не асабліва паказвае свайго каханага. Але раней «Наша Ніва» высветліла, пра каго ідзе гаворка. Ён таксама жыве ў Празе. У акаўнце пазначана, што мужчына звязаны з кампаніяй, якая займаецца праектаваннем і будаваннем прыватных дамоў, і кампаніяй, якая вырошчвае бансай.

Каментары да артыкула