Рэкорднымі тэмпамі ідзе збор на ўкол для Ксюшы з магілёўскага дзетдома, ад якой адмовілася мама — яшчэ плюс $190 тысяч за дзень
«Вы цяпер частка яе сям'і, яе выратавальнікі, яе надзея».
Як паведамляюць валанцёры, за 4 дні для Ксюшы Маісеенка з Магілёва сабралі 523 461 даляр. Такіх тэмпаў збору ў Беларусі, відаць, не было. Але засталося сабраць яшчэ шалёную суму — каля 1,3 млн даляраў.
«Ксюша будзе жыць. Зараз гэта не надзея — гэта абяцанне. Яна зможа дыхаць. Зможа ўсміхацца. Зможа аднойчы ўстаць на ножкі і абняць таго, хто стане ёй сям’ёй. Дзякуй, што не праходзіце міма. За тое, што дорыце ёй будучыню. Вы — анёлы, якіх яна яшчэ не ведае, але якія ўжо змянілі яе жыццё назаўжды. Мы працягваем змагацца за яе. І цяпер упэўнены, што мы пераможам», — пішуць валанцёры.
Ксюшы Маісеенцы тры з паловай гады. У 2024 годзе Ксюшы паставілі дыягназ спінальная мышачная атрафія другога тыпу (СМА). Гэта рэдкая генетычная хвароба, пры якой паступова гінуць нейроны, што адказваюць за рух.
Мышцы становяцца ўсё слабейшымі. Дзіця страчвае сілу, спачатку ў руках і нагах, потым становіцца цяжка сядзець, трымаць галаву, глытаць ежу, дыхаць. І пасля — смерць.
У свеце ёсць лекі, якія могуць спыніць хваробу. Гэта генная тэрапія Zolgensma, бадай, самыя дарагія лекі ў свеце. Дзіця вылечваецца літаральна ад аднаго ўколу. Праблема ў тым, што іх кошт — каля $1,8 мільёна. А беларуская дзяржава пакуль не гатовая ўключыць выратаванне дзяцей з СМА ў праграму бясплатнай медыцыны.
Адметнасць сітуацыі Ксюшы ў тым, што яна жыве ў магілёўскім дзіцячым доме. Яе бацька памёр. А мама не справілася з цяжарам сітуацыі і здала дзяўчынку ў дзяржаўную ўстанову.
Дапамогі ад бацькоў чакаць не выпадае, але за Ксюшу змагаюцца іншыя людзі. Вакол Ксюшы хутка з’явілася суполка валанцёраў. Яны стварылі чаты, групы і старонкі ў сацсетках, дзе каардынуюць дапамогу.
Гаворка не толькі пра збор грошай. Хтосьці дапамагае з распаўсюдам інфармацыі. Хтосьці шукае фонды і арганізацыі. Хтосьці гатовы пісаць лісты кампаніям. Хтосьці прапануе арганізаваць дабрачынныя акцыі.
У чатах пастаянна з’яўляюцца новыя ідэі. Напрыклад, у Полацку на 14 сакавіка запланаваная дабрачынная акцыя ў піцэрыі: частка грошай з продажу піцы пойдзе на дапамогу Ксюшы.
Іншыя прапануюць зрабіць чэлендж у сацсетках, напрыклад, адмовіцца ад кавы, салодкага або нейкіх пакупак на некалькі тыдняў, а зэканомленыя грошы пералічыць на збор.
Хтосьці робіць відэа для сацсетак, у тым ліку на англійскай мове.
«Мы будзем трымаць вас у курсе кожнага кроку, кожнай навіны пра Ксюшы. Таму што вы цяпер частка яе сям'і, яе выратавальнікі, яе надзея», — пішуць валанцёры.
У Беларусі гэты ўкол можна зрабіць толькі пакуль дзіця важыць да 13,5 кілаграма. Ксюша зараз важыць каля 12,9 кг. Гэта значыць, што часу застаецца ўсё менш. Менавіта таму збор называюць звыштэрміновым.
Рэквізіты для дапамогі
МТС (папаўненне баланса): +375292375886
Беларусбанк:
BYN: BY21 AKBB 3134 0000 0237 7007 0000
USD: BY45 AKBB 3134 1000 0149 9007 0000
EUR: BY03 AKBB 3134 2000 0128 5007 0000
RUB: BY46 AKBB 3134 3000 0142 1007 0000