«Джон Уік прыйдзе па цябе». Амерыканец разбіў сваю Tesla, а праз год знайшоў яе ў Беларусі — і мог дыстанцыйна ёй кіраваць
Амерыканец Эндру Трэн атрымаў дыстанцыйны кантроль над аўтамабілем, які знаходзіцца ў Гродне. Фірма, што прадае бітыя аўто з ЗША ў Беларусь, не адключыла машыну ад Tesla-акаўнта былога ўласніка, піша Hrodna.life.
Ілюстрацыйны здымак. Фота: vecteezy.com
Эндру змог пабачыць дакладнае месца знаходжання свайго былога аўто — Tesla Model 3 знайшлася на вуліцы Грандзіцкай у Гродне.
«У мінулым годзе мой стары аўтамабіль разбіўся ўшчэнт. Мой уліковы запіс так і не адвязалі ад яго… Сёння я атрымаў ліст, што машыну падпісалі на Premium Connectivity. Я паглядзеў — і яна ў… Беларусі», — напісаў ён у Threads.
Паслуга Premium Connectivity ад Tesla каштуе $9,99 у месяц і дазваляе карыстацца палепшанымі мапай і навігатарам, функцыямі бяспекі і назірання, а таксама стрыміць музыку і відэа непасрэдна ў машыну.
Эндру заўважыў, што дзякуючы не скасаванаму ўліковаму запісу ён мог адкрываць і закрываць дзверы ў машыне, апускаць шыбы, сігналіць, уключаць і выключаць фары. І ўсё гэта, знаходзячыся за 9700 кіламетраў ад свайго старога аўто.
Скрыншот з Instagram-акаўнта Эндру
«Мужык, не лезь да гэтых хлопцаў. Памятай, Джон Уік быў дзіцём Беларусі»
Карыстальнікі Threads адразу пачалі даваць яму парады, як пажартаваць з новага ўласніка аўто.
Адныя прапаноўвалі ўключаць падагрэў сядзення на максімум, іншыя — уключыць «рэжым вечарынкі». Былі прапановы абмежаваць хуткасць аўто або ўключыць на поўную гучнасць песні «Пагоня» і «Мы выйдзем шчыльнымі радамі».
Але большасць раіла проста быць прыстойным чалавекам, выдаліць аўто са свайго акаўнта і не чапаць новага ўласніка.
Некаторыя выкарыстоўвалі мем пра папулярнага героя Кіану Рыўза.
«Мужык, не лезь да гэтых хлопцаў. Памятай, Джон Уік быў дзіцём Беларусі».
«Калі ты сапраўды хочаш нешта зрабіць з той машынай, памятай, што Джон Уік насамрэч з Беларусі».
«Джон Уік ідзе па цябе».
Амерыканцу таксама растлумачылі, што такія падарожжы бітых амерыканскіх машын — звычайная справа.
«Амерыканскае паняцце «разбіты ўшчэнт» у іншых краінах азначае «трохі пашкоджана, можна адрамантаваць»», — напісалі ў каментарыях. Маўляў, калі рамантаваць аўто ў ЗША эканамічна нявыгадна, а танней купіць новую, то ў Беларусі, улічваючы значна ніжэйшы кошт працы, бітае аўто не так і складана вярнуць да жыцця. А калі машына была застрахавана, то тым больш у Амерыцы яе не будуць рамантаваць — страхавая кампанія проста прадасць яе з аўкцыёну.
«Перадайце новаму ўласніку падзяку»
Неўзабаве Эндру дапоўніў свой пост:
«Я ўжо выдаліў машыну са свайго акаўнта. Я ўсхваляваўся толькі таму, што мой уліковы запіс выкарыстоўваўся для падпіскі, на якую я не згаджаўся. Акрамя адмены падпіскі, я нічым больш дыстанцыйна не кіраваў», — запэўніў амерыканец.
Агулам ён вельмі рады, што яго старая машына атрымала новае жыццё. У свой час ён назваў яе Nova ў гонар персанажа з камп’ютарнай гульні StarCraft.
«Гэта была любімая машына, якую я так доўга хацеў набыць, і яна была са мной у радасці і ў горы. Двойчы праехаў на ёй праз усю Амерыку, ад акіяна да гор, ад пустынь да снягоў».
Эндру папрасіў у карыстальнікаў Threads, калі яны знойдуць новага ўладальніка, падзякаваць яму за тое, што ён даў машыне новае жыццё.
Эндру Трэн — 40‑гадовы амерыканец в’етнамскага паходжання. Ён кіраўнік у галіне прадукту і дызайну. Працаваў у сферы аховы здароўя, штучнага інтэлекту, віртуальнай рэальнасці ў розных кампаніях — ад стартапаў да глабальных карпарацый. Зараз працуе ў кампаніі Meta.