Мінчанка падзякавала службе бяспекі метрапалітэна за надгляд рэчаў сына
Звычайна працэдура надгляду не выклікае ў пасажыраў станоўчых эмоцый. Але, калі верыць прэс-служба метрапалітэна, з гэтай нагоды там атрымалі падзяку ад мінчанкі.
На электронную пошту Мінскага метрапалітэна прыйшоў ліст, у якім Таццяна М. выказала падзяку за надгляд рэчаў яе сына на адной са станцый метро, гаворыцца ў паведамленні.
Як піша канал метрапалітэна, падчас праверкі рэчаў інспектар службы бяспекі знайшоў у заплечніку маладога чалавека ключы ад кватэры, якія лічыліся згубленымі, — яны заваліліся за падкладку.
«Так што, нечакана, надгляд аказаўся карысным. Хачу дадаць са свайго досведу, што работнікі службы бяспекі метрапалітэна заўсёды паводзяць сябе карэктна і не затрымліваюць пасажыра па часе», — нібыта так, паводле паведамлення прэсавай службы, завяршыла свой ліст Таццяна.