У Мінску мінак пачуў размову выпадковай жанчыны па тэлефоне і пазваніў у міліцыю
Мінчук пачуў на вуліцы, як жанчына з кімсьці размаўляла па тэлефоне. Яна выглядала разгублена і кудысьці спяшалася.
Мужчыну гэта здалося падазроным, і ён патэлефанаваў на лінію 102, паведамляе прэс-служба мінскай міліцыі.
У міліцыі ўстанавілі асобу 67‑гадовй пенсіянеркі. Яна сапраўды размаўляла з махлярамі і па іх просьбе ўжо паспела пакінуць у падвале дома 24 000 рублёў.
Дарэчы, да гэтага ёй патэлефанавалі ілжэсупрацоўнікі «Энергасбыту», якія пад выглядам замены лічыльнікаў завалодалі асабістымі данымі і кодам з СМС. Потым прыгразілі пенсіянерцы турмой і ўгаворвалі «задэклараваць» зберажэнні.
Махлярам не ўдалося завалодаць грашыма мінчанкі — іх канфіскавалі аператыўнікі і вернуць уласніцы.