У Еўропе невядомыя скралі грузавік з 12 тонамі батончыкаў KitKat
Кампанія Nestle паведаміла, што на мінулым тыдні ў Еўропе скралі грузавік, на якім перавозілі больш за 413 тысяч шакаладак KitKat, або каля 12 тон батончыкаў. Пра гэта піша Reuters.
Здымак ілюстрацыйны. Фота: vecteezy.com
Паводле інфармацыі кампаніі — вытворцы KitKat, грузавік з сотнямі тысяч батончыкаў выехаў з Італіі і павінен быў развозіць шакалад па ўсёй Еўропе, але так і не дабраўся да канчатковага пункта ў Польшчы.
У Nestle не ўдакладнілі, дзе менавіта знік тавар, аднак адзначылі, што месцазнаходжанне транспарту і шакаладу дагэтуль невядомае.
У кампаніі дадалі, што могуць адсачыць выкрадзеныя KitKat з дапамогай QR-кода на ўпакоўцы, таму калі нехта паспрабуе яго адсканаваць, сістэма дасць інструкцыі аб тым, як звязацца з кампаніяй.
«Хоць мы цэнім выключны густ злачынцаў, факт застаецца фактам, што крадзеж грузаў з'яўляецца недапушчальным для прадпрыемстваў любога памеру», — заявілі ў кампаніі KitKat.
Яны таксама папярэдзілі, што крадзеж можа прывесці да дэфіцыту батончыкаў у Еўропе, у прыватнасці напярэдадні велікодных святаў.
«Расследаванні працягваюцца ў цесным супрацоўніцтве з мясцовымі ўладамі і партнёрамі па ланцужку паставак», — адзначыў вытворца.
Чытайце таксама:
«Камунарка» выпусціла аналаг «кіндараў»
Пад Віцебскам пачалі вырабляць бялковыя батончыкі. Праўда, пакуль што не для беларусаў