Жыхар Гродна зрабіў прапанову сваёй каханай проста на сцэне тэатра
Кранальная падзея адбылася ў суботні вечар у драматычным тэатры Гродна.
Пасля спектакля «Цёткі» адзін з гледачоў — Дзмітрый — падняўся на сцэну і зрабіў прапанову рукі і сэрца сваёй дзяўчыне Алесі. Гісторыю пары распавяла тэлерадыёкампанія Гродна, піша Onliner.by.
Жаніх і нявеста пазнаёміліся ў Мінску на працы. Алеся толькі ўладкавалася ў калектыў, а ўжо праз тыдзень Дзмітрый патэлефанаваў ёй ранняй раніцай, каб павіншаваць з днём нараджэння. З гэтага моманту паміж імі завязаліся стасункі, а потым і адносіны.
З часам у пары з’явілася агульнае захапленне — тэатр. Жывучы ў сталіцы, яны паспелі наведаць практычна ўсе тэатральныя пляцоўкі горада і часта праводзілі вечары на спектаклях.
Таму месца для прапановы Дзмітрый выбраў сімвалічнае. Ён даўно абяцаў паказаць Алесі Гродзенскі драмтэатр і менавіта там вырашыў ажыццявіць задуманае. Мужчына запрасіў каханую на сцэну, сказаў прыгожыя словы, уручыў пярсцёнак і букет. Вядома ж, дзяўчына пад апладысменты гледачоў адказала «так».