У Мінск прывязуць знакамітую «Прагулку» Шагала
«Прагулка» будзе выстаўляцца ў межах часовай экспазіцыі «Выстава аднаго шэдэўра».
Знакамітае палатно мастака Марка Шагала «Прагулка» даставяць у Мінск на гэтым тыдні. Карціна стане цэнтральным экспанатам унікальнай часовай выставы, якая адкрыецца ў Нацыянальным мастацкім музеі на пачатку красавіка, паведамляюць Мінск-навіны.
Адпаведны дакумент падпісаў першы намеснік міністра Дзмітрый Шляхцін.
— Ужо на гэтым тыдні ў Мінск прыбывае доўгачаканы экспанат. Спойлер — гэта адна з самых пазнавальных работ мастака з Беларусі, на якой адлюстраваны яго родны горад такім, якім яго ўбачыла натхнёнае сэрца майстра, — адзначылі ў ведамстве.
Палатно належыць Дзяржаўнаму Рускаму музею.
«Прагулка» будзе выстаўляцца ў межах часовай экспазіцыі «Выстава аднаго шэдэўра». Дакладную дату яе адкрыцця арганізатары паведамяць пазней.