Наколькі правамерныя дзеянні міліцыі? На сайце калегіі адвакатаў спыталі пра «Гуканне вясны» ў Гомелі
Адказы адвакатаў былі лаканічнымі.
Ілюстрацыйны здымак
На сайце Беларускай рэспубліканскай калегіі адвакатаў «Флагшток» заўважыў пытанне жыхара Гомеля аб правамернасці дзеянняў міліцыі пры затрыманні жанчыны за «Гуканне вясны».
У рубрыцы «Юрыдычная анлайн-кансультацыя» адвакатам задалі такое пытанне:
«Дачка паўдзельнічала ў абрадзе «Гуканне вясны» ў Гомелі, арганізаваным рэстаранам «Спадчына». Праз некалькі дзён пасля гэтага да нас дадому з'явіліся супрацоўнікі РАУС і забралі дачку ў аддзел для правядзення прафілактычнай працы. З-за гэтага была сарваная яе праца ў каледжы. Пратрымаўшы дачку ў РАУСе каля васьмі гадзін, ёй патлумачылі, што яна ўдзельнічала ў несанкцыянаваным мерапрыемстве. Наколькі правамоцныя дзеянні супрацоўнікаў правапарадку?»
Адвакат Крысціна Якута-Марчук адказала коратка, не пракаментаваўшы пытанне аб правамернасці дзеянняў міліцыі:
«Калі былі падставы, маглі і затрымаць. І растлумачыць таксама маглі. Трэба глядзець, як усё афармлялася».
Аўтар пытання дадаў каментар:
«Дачка ў міліцыі знаходзілася з васьмі раніцы да 16:00. Чаканне разбору 6 гадзін і так званая прафілактычная гутарка 2 гадзіны. Двое супрацоўнікаў з ёй паразмаўлялі і выдалі даведку аб прычыне адсутнасці на працы. Больш ніякіх дакументаў не далі. Ёй растлумачылі, што яна павінна была высветліць сама, ці ёсць у рэстарана дазвол на правядзенне мерапрыемства. Наколькі правільныя дзеянні супрацоўнікаў міліцыі?»
Гэтае пытанне засталося без адказу.
Чытайце таксама:
У гомельскім рэстаране затрымалі ўдзельнікаў «Гукання вясны». Ім даюць суткі і буйныя штрафы