Пайшоў з жыцця дзіцячы рэаніматолаг і выкладчык БДМУ Аляксей Кулагін
Міністэрства аховы здароўя паведаміла пра смерць кандыдата медыцынскіх навук, дацэнта Аляксея Яўгенавіча Кулагіна. Ён узначальваў кафедру дзіцячай анестэзіялогіі і рэаніматалогіі Беларускага дзяржаўнага медыцынскага ўніверсітэта. Яму было 70 гадоў.
Аляксей Кулагін зрабіў значны ўнёсак у развіццё айчыннай медыцыны. Дзякуючы яго дзейнасці ў клінічную практыку былі шырока ўкаранёныя новыя метады анестэзіі ў дзяцей, паведамляе міністэрства. Асноўныя навуковыя даследаванні вучонага былі прысвечаны павышэнню якасці анестэзіялагічнай дапамогі і інтэнсіўнай тэрапіі гнойна-септычных станаў у дзяцей.
Акрамя навуковай і выкладчыцкай працы са студэнтамі, Аляксей Яўгенавіч прымаў актыўны ўдзел у лячэнні пацыентаў: штогод ён аглядаў да 2000 дзяцей у аддзяленнях інтэнсіўнай тэрапіі і рэанімацыі па ўсёй краіне.