У Мінфіне падлічылі, колькі бюджэту будзе каштаваць здароўе аднаго беларуса ў 2026 годзе
Мінімальны нарматыў на бясплатную медыцыну ў разліку на аднаго жыхара краіны ў 2026 годзе складае амаль 1700 рублёў. Такія даныя прыводзіць Міністэрства фінансаў.
Фота: Мінск-навіны
Усяго ў гэтым годзе на ахову здароўя плануюць выдаткаваць 15,3 млрд рублёў. Асноўную частку сумы (12 млрд) выдадуць мясцовыя бюджэты, яшчэ 3,3 млрд дадасць рэспубліканская казна.
Гэтыя грошы пойдуць на абнаўленне і рамонт бальніц і паліклінік, закупку сучаснага абсталявання і лекаў. Таксама за кошт бюджэту аплацяць праграмы прафілактыкі і правядзенне дыспансерызацыі.
Раней сталічныя ўлады раскрылі сабекошт некаторых медпаслуг, піша Office Life.
Так, адзін візіт да тэрапеўта абыходзіцца бюджэту прыкладна на 45 рублёў, а да стаматолага — амаль 70 рублёў. Суткі ў рэанімацыі каштуюць каля 1,7 тыс. рублёў, што фактычна роўна гадавому нарматыву расходаў на аднаго чалавека.