Расійская атака на Адэсу — двое загінулых, ёсць пацярпелыя і дзясяткі пашкоджаных дамоў
У ноч на 11 красавіка расійскія войскі атакавалі Адэсу.
У выніку трапляння ў жылы сектар загінулі два чалавекі, ёсць пацярпелыя, пашкоджаныя дзясяткі дамоў, інтэрнат і дзіцячы садок, піша «Украінская праўда».
«Чарговая ноч пад атакай ворага прынесла Адэсе трагічныя наступствы. У выніку трапляння ў жылы сектар загінулі два чалавекі. Мае шчырыя спачуванні родным і блізкім. Яшчэ двое пацярпелых цяпер знаходзяцца ў бальніцы, дзе ім аказваецца ўся неабходная дапамога», — напісаў кіраўнік гарадской ваеннай адміністрацыі Сяргей Лысак.
Лысак адзначыў, што значныя пашкоджанні атрымала грамадзянская інфраструктура: дзясяткі прыватных і шматкватэрных дамоў, інтэрнат, а таксама будынак дзіцячага садка. У дамах выбітыя вокны, пашкоджаныя дахі і фасады. Акрамя таго, пашкоджаныя ўстановы грамадскага харчавання.