Міністр замежных спраў Літвы выказаў салідарнасць з ЕГУ
Міністр замежных спраў Літвы Кястуціс Будрыс выказаў падтрымку Еўрапейскаму гуманітарнаму ўніверсітэту (ЕГУ) пасля рашэння ўладаў Беларусі прызнаць яго «экстрэмісцкай арганізацыяй».
Кястуціс Будрыс. Фота: AP Photo / Mindaugas Kulbis
«Крок Мінска па прызнанні «экстрэмісцкай арганізацыяй» Еўрапейскага гуманітарнага ўніверсітэта, акрэдытаванага беларускага ўніверсітэта, які працуе ў выгнанні ў Вільні, з’яўляецца абуральным.
Ён падвяргае студэнтаў, выкладчыкаў і іх сем’і сур’ёзнай рызыцы і перашкаджае доступу да незалежнай, аб’ектыўнай адукацыі.
Гэта яшчэ адзін варожы крок з боку рэжыму Аляксандра Лукашэнкі супраць Літвы і ЕС. Мы гатовыя падтрымаць супольнасць ЕГУ», — напісаў Будрыс у сацсетцы X.
14 красавіка стала вядома, што Вярхоўны суд Беларусі прызнаў ЕГУ і яго структуры «экстрэмісцкай арганізацыяй». У Генпракуратуры заявілі, што ўніверсітэт нібыта фінансуецца замежнымі структурамі і рыхтуе моладзь «да рэалізацыі заходніх сцэнарыяў трансфармацыі палітычнай сістэмы, прасоўвання так званых дэмакратычных каштоўнасцяў, «альтэрнатыўных» трактовак гістарычных, культурных і іншых падзей».
Чытайце таксама:
ЕГУ прызналі экстрэмісцкай арганізацыяй
МЗС Літвы выдала ноту пратэсту супраць Беларусі і прыгразіла зноў закрыць мяжу