У цэнтры Мінска пашыраць музей міліцыі. Каб прыбудаваць трохпавярховы шкляны корпус, зменяць закон
Музею стала цесна ў гістарычных мурах дарэвалюцыйнага будынка — няма дзе ўшанаваць «сучаснасць» сілавога ведамства, таму вырашылі прыбудаваць да яго трохпавярховы шкляны корпус. Забарону будаваць у гэтым месцы гатовае аператыўна дапамагчы вырашыць Міністэрства культуры, якое мусіла б гэтую забарону адстойваць.
Дом па вуліцы Гарадскі Вал, 7, дзе размяшчаецца музей МУС Беларусі. Фота: Wikimedia Commons
Дом нумар 7 па вуліцы Гарадскі Вал у Мінску — гэта дарэвалюцыйны двухпавярховы цагляны будынак у стылі мадэрн, узведзены ў 1914 годзе.
Пасля вайны тут была сталовая Міністэрства ўнутраных спраў, размешчанага цераз дарогу, а цяпер — музей гэтага ведамства.
Экспазіцыя музея МУС Беларусі. Фота: Яндэкс Карты
Экспазіцыя музея МУС Беларусі. Фота: Яндэкс Карты
Але экспанатам і амбіцыям ведамства ў старых пакоях відавочна не хапае месца. МУС запланавала рэканструкцыю, якая прадугледжвае ўзвядзенне на месцы цяперашняга гаспадарчага навеса, пад якім стаіць рарытэтная аўтатэхніка, новага трохпавярховага корпуса.
Апетыт сілавікоў прапісаны ў заданні на праектаванне даволі дэталёва. На першым, самым маленькім паверсе (80 м2) павінна з'явіцца пляцоўка для ўрачыстых мерапрыемстваў. На другім паверсе плошчай 120 м2 размесціцца прасторная «зала сучаснасці», якая будзе злучацца непасрэдна з гістарычным будынкам музея. На трэцім — абсталююць службовыя кабінеты для супрацоўнікаў. Каб прыбудова выглядала максімальна сучасна, праектантам загадалі шчодра выкарыстаць шкло і празрыстыя канструкцыі на ніжніх ярусах.
Навес для рэтрааўтамабіляў побач з музеем МУС, на месцы якога хочуць узвесці прыбудову. Фота: Яндэкс Карты
Праз тое, што будынак размешчаны літаральна ў двары пасляваеннай забудовы, умовы для пашырэння вельмі абмежаваныя. Фота: Яндэкс Карты
Праўда, на шляху міліцэйскіх будаўнічых планаў паўстала заканадаўства. Рэч у тым, што тэрыторыя вакол помніка мадэрну мае афіцыйны статус зоны аховы ландшафту.
Міністэрства культуры прадэманстравала ўзорную бюракратычную пакорлівасць. У афіцыйным лісце намеснік міністра культуры Сяргей Саракач прызнаў, што паводле Кодэкса аб культуры будаўніцтва ў гэтай ландшафтнай зоне сапраўды забаронена.
Схема зон аховы гістарычнай культурнай каштоўнасці, якія замінаюць сілавікам узвесці прыбудову да свайго музея. Фота: з тэндарнай дакументацыі
Аднак чыноўнік адразу ж дадаў, што яго ведамства прынцыпова не пярэчыць супраць узвядзення новага корпуса для МУС. Выхад Мінкульт прапанаваў выключна просты: калі закон забараняе будаваць у ахоўнай зоне, значыць, трэба проста перамаляваць гэтыя зоны. Больш за тое, культурнае ведамства паабяцала максімальна аператыўна і без затрымак узгадніць новы праект, як толькі паперы паступяць ім на стол.
Атрымаўшы зялёнае святло і абяцанні хуткай дапамогі, Дэпартамент фінансаў і тылу МУС абвясціў тэндар на распрацоўку новага праекта зон аховы, які мусіць юрыдычна апраўдаць з'яўленне шкляной прыбудовы ўшчыльную да гістарычнага будынка.