«Ермака няма — але ён ёсць». Пасля адстаўкі былы кіраўнік Офіса прэзідэнта Украіны стаў менш публічным, але не менш уплывовым
«Адзін сігнал прэзідэнта, і ўсе перастануць браць трубку ад Андрэя Барысавіча. Але гэтага сігналу няма».
Фота: lyas Tayfun Salc / Anadolu via Getty Images
Былы кіраўнік Офіса прэзідэнта Украіны Андрэй Ермак пасля адстаўкі фармальна адышоў ад публічнай ролі, аднак і далей захоўвае вызначальны ўплыў на кадравыя рашэнні і ўнутраныя працэсы на Банкавай.
Паводле звестак крыніц «Украінскай праўды» ў палітычных і бізнэс-колах, Ермак захоўвае кантроль над большасцю прызначэнцаў у Офісе прэзідэнта Украіны і мае поўнае ўяўленне пра ўнутраныя працэсы.
«Адзін сігнал прэзідэнта, і ўсе перастануць браць трубку ад Андрэя Барысавіча. Але гэтага сігналу няма. Наадварот, ёсць сігнал, які пацвярджае паўнамоцтвы Андрэя», — падкрэслівае крыніца УП у палітычных колах.
Іншы суразмоўца ва ўладнай вертыкалі сцвярджае, што ўплыў Ермака не знік, а толькі стаў менш публічным: «Ермака няма — але ён ёсць. Проста цяпер яму трэба адпраўляць не 10 смсак, а 5. А ўсё астатняе пракантралююць давераныя асобы».
Суразмоўцы УП таксама паказваюць, што шэраг ключавых людзей ва ўладзе захавалі свае пазіцыі, а кадравыя рашэнні застаюцца пад уплывам Ермака.
«Свірыдзенка на месцы. Кулеба на месцы. Краўчанка на месцы. Пронін на месцы. Нават Кіпер на месцы. ГУР — крэатура АБ. Кастынг на кіраўніка СВР — таксама АБ. Што змянілася пасля адстаўкі Ермака? Буданаў прыйшоў у ОП? Ну дык хай паспрабуе змяніць кагосьці са сваіх намеснікаў — дакладней намеснікаў Ермака», — кажа суразмоўца.
28 лістапада 2025 года ва ўрадавым квартале дэтэктывы НАБУ і пракуроры САП правялі ператрусы ў кіраўніка Офіса прэзідэнта Андрэя Ермака. Ермак пацвердзіў, што ператрусы праходзяць па месцы яго пражывання, і заявіў пра гатоўнасць садзейнічаць следству.
Пасля Зяленскі паведаміў, што звольніў Андрэя Ермака з пасады кіраўніка Офіса прэзідэнта. 2 студзеня Зяленскі прызначыў кіраўніка ГУР Кірыла Буданава кіраўніком Офіса прэзідэнта.
Сам Ермак паведаміў, што ідзе на фронт пасля таго, як падаў у адстаўку на фоне карупцыйнага скандалу і следчых дзеянняў НАБУ ў яго жыллі.