У Польшчы адмянілі канцэрт скандальнага рэпера Канье Уэста
Прычына — яго антысеміцкія выказванні.
Фота: Scott Dudelson/Getty Images
У Польшчы ў пятніцу абвясцілі пра адмену чэрвеньскага канцэрту амерыканскага рэпера Канье Уэста, які шмат гадоў эпатаваў публіку антысеміцкімі, расісцкімі і пранацысцкімі выказваннямі, піша Бі-бі-сі.
Канцэрт Канье Уэста, які пяць гадоў таму змяніў імя на «Йе», планаваўся на 19 чэрвеня ў горадзе Хожуў на поўдні Польшчы. Ён мог бы стаць першым яго выступам у Польшчы за 15 гадоў, але ў пятніцу стадыён, дзе планавалася выступленне, заявіў, што яго не будзе — «па фармальных і юрыдычных прычынах».
Раней міністр культуры Польшчы Марта Цянкоўская заявіла, што лічыць рашэнне запрасіць Уэста «непрымальным».
У ходзе еўрапейскага турнэ Уэст, акрамя Польшчы, збіраўся выступіць у Брытаніі і Францыі, але брытанскія ўлады 6 красавіка забаранілі яму ўезд у краіну, а праз некалькі дзён пра тое, што рашэнне аб канцэрце адкладзена, абвясцілі арганізатары мерапрыемства ў Марсэлі.
У лютым мінулага года Уэст пачаў прадаваць футболкі са свастыкай, з-за чаго гандлёвая анлайн-пляцоўка Shopify выдаліла яго краму.
Праз тры месяцы рэпер выпусціў твор пад назвай «Хайль Гітлер», у якім паведаміў, што нацыстам яго зрабілі цяжба за апекунства над дзіцем і замарожванне яго актываў.
У студзені, перад тым як абвясціць аб еўрапейскім туры і выпуску новага альбома, Уэст аплаціў цэлую старонку ў газеце Wall Street Journal, на якой папрасіў прабачэння за свае выказванні і ўчынкі.
«Я не нацыст і не антысеміт. Я люблю яўрэяў», — напісаў Уэст і патлумачыў, што «страціў сувязь з рэальнасцю» з-за біпалярнага расстройства.
У Польшчы прапаганда нацысцкай сімволікі з'яўляецца злачынствам, за якое належыць да трох гадоў турмы.
Для Польшчы нацысцкая сімволіка і ідэалогія — асабліва балючае пытанне. Нацысцкая Германія акупавала і расчляніла краіну. Нацысты масава дэпартавалі палякаў, а таксама стварылі на тэрыторыі краіны лагеры смерці, дзе забілі мільёны еўрапейскіх яўрэяў, у тым ліку 3 млн польскіх.
«Гэты артыст публічна выказваў антысеміцкія погляды, прыніжаў цяжар злачынстваў і зарабляў на футболках са свастыкай, — напісала міністр культуры Цянкоўска ў сетцы X. — Гэта наўмысны пераход межаў і нармалізацыя нянавісці. У культуры не павінна быць месца тым, хто карыстаецца ёю для распаўсюджвання нянавісці».
Перад тым, як пра адмену канцэрта абвясціў польскі стадыён, прэс-сакратар міністэрства культуры Польшчы Пётр Енджэеўскі сказаў Бі-бі-сі, што ўлады не могуць проста забараніць канцэрт, паколькі для гэтага няма адпаведнага закона.
Ён дадаў, што МЗС Польшчы — таксама супраць канцэрта Уэста.