«Пасля пяцігадовай візы далі на тры месяцы». Як беларусы цяпер атрымліваюць шэнген

Беларусы і ў 2026 годзе настойліва шукаюць варыянты зрабіць шэнгенскую візу, пажадана не аднаразовую. Здавалася б, усе ўжо даўно альбо прынялі новыя правілы гульні, альбо прыглядаюцца да Японіі і В’етнама, але шматгадовыя чэргі ўсё роўна карацейшымі не становяцца, а навіны пра найменшыя новаўвядзенні пасольстваў і візавых цэнтраў збіраюць вялікую колькасць праглядаў. Выданне «Анлайнер» разам з экспертамі і шчаслівымі ўладальнікамі віз высветліла, наколькі складана, доўга і дорага будзе гэтым летам атрымаць шанец паплаваць на Крыце, паесці марожанага ў Рыме і вустрыц у Парыжы.

Як сітуацыя з візамі змянілася з 2025 года?

Гэтым разам дапамагчы разабрацца з важнымі «шэнгенскімі» пытаннямі выданне папрасіла Кацярыну Сігейкіну, дырэктарку візавага агенцтва «ВізаУсім». Самае надзённае пытанне, якое звычайна ўсе задаюць з надзеяй: ну як, ці стала лепш? Экспертка адказвае, што дакладна не стала горш, што ў цяперашніх рэаліях ужо з’яўляецца нагодай для радасці.

«Па-ранейшаму самым папулярным у беларусаў застаецца іспанскі «шэнген». Таму што з усіх варыянтаў, даступных у найбліжэйшыя паўгода, ён адзіны, дзе ёсць шанец атрымаць візу не на даты паездкі (калі мы гаворым пра турыстычную, не гасцявую). Ёсць опцыя падачы як у Мінску, так і ў Маскве з трансферам туды-назад.

З новых магчымасцяў: французскае пасольства стала прымаць заяўкі на турыстычныя візы не толькі з групавымі турамі. Праўда, чакаць падачу там прыйдзецца ў большасці выпадкаў ад трох да шасці месяцаў. Гэты варыянт цяпер таксама запатрабаваны, але наўрад ці падыдзе тым, хто плануе з’ехаць у адпачынак раней, чым праз паўгода».

Што рабіць, калі адпачынак ужо «гарыць»?

Мадэлюем сітуацыю: даты адпачынку прызначаныя на канец мая, вельмі ўжо хочацца паспець з’ехаць хоць куды-небудзь у Еўропу, пажадана на мора. На такі выпадак Кацярына рэкамендуе толькі адну опцыю: грэчаскі «шэнген». Падацца на яго можна не толькі ў Мінску, але і ў іншых рэгіёнах з дзейнымі візавымі цэнтрамі. Экспертка адзначае, што, зрабіўшы візу, вы з ёй можаце потым паехаць куды заўгодна, не абавязкова ў Грэцыю.

— Яшчэ год таму грэкі вельмі строга правяралі бронь гатэля і маглі ануляваць візу, калі турыст у яго не засяліўся. Цяпер гэта не так?

— Раней такое сапраўды было, але, паводле апошняй інфармацыі, такое ўжо амаль не практыкуецца. Да таго ж канкрэтна наша агенцтва, напрыклад, для падачы дае гатэльны ваўчар — у консульстве залічваюць гэта як за аплачанае месца пражывання. Так, проста заброніраваны на Booking гатэль выкліча сумневы, засяленне праверыць могуць. Ануляваць візу ў такім выпадку таксама, ну альбо ўзнікнуць пытанні па вяртанні з Шэнгена.

Калі мы сталі працаваць з ваўчарамі, значна зменшылася і колькасць адмоў (раней грэкі імі славіліся). У сакавіку з намі на грэчаскую візу падаваліся 50 чалавек, было ўсяго дзве адмовы. Але, вядома ж, трэба памятаць, што грэкі ставяць візу толькі пад даты паездкі, нават калі з імі ў вас ёсць візавая гісторыя і пацверджаныя візіты ў Грэцыю.

Запыт: «Атрымаць бы хоць якую-небудзь візу летам, а там ужо буду вырашаць»

Калі запаветная наклейка ў пашпарт вам адносна не да спеху, то найлепшай опцыяй будзе ўсё тая ж іспанская віза — нездарма яна самая папулярная. Што па тэрмінах? Мяркуючы па статыстыцы, іспанцы, хутчэй за ўсё, не паскупяцца на што-небудзь ад месячнага да паўгадавога «шэнгену» — калі ёсць гісторыя знаходжання ў краіне, шанцы на другі адпаведна вышэйшыя. Год, два — бывае, але гэта хутчэй выключэнне.

Кацярына, праўда, нагадвае, што цяпер пачынаецца сезон, а паколькі іспанскі варыянт вельмі запатрабаваны ў беларусаў, час чакання падачы цалкам можа зраўняцца з тэрмінамі самой візы.

«Чаканне запісу ў Мінску можа доўжыцца каля 2—3 месяцаў. То-бок да летняга адпачынку рабіць іспанскую візу ўжо можа быць рызыкоўна. Калі казаць пра падачу ў Маскве, то ў візавы цэнтр рэальна трапіць на працягу месяца. Але трэба ўлічваць, што пашпарты ў іспанцаў цяпер знаходзяцца на разглядзе ад 45 да 60 дзён — таксама важны нюанс для тых, хто хоча паспець зрабіць візу, напрыклад, да чэрвеня».

Уключаем матэматыку. Месцы іспанскі візавы цэнтр выдае двойчы на месяц, на два тыдні наперад. На наступным тыдні чакаюцца даты на першую палову мая. То-бок нават калі вам пашчасціць патрапіць у гэты слот, але затым пашпарт праляжыць у пасольстве 60 дзён, то ўжо атрымліваецца, што паездку ў якую-небудзь Барселону варта планаваць не раней, чым на сярэдзіну ліпеня.

Топ-3 самых дружалюбных пасольстваў, якія забяспечаць раскошны максімум

Грэцкая «аднаразоўка» і іспанская віза на месяц — гэта, увогуле, таксама нядрэнна. Але пагадзіцеся, жыццё ззяе нейкімі новымі фарбамі, калі ў пашпарце ёсць дзейны «шэнген» на пару гадоў і ў любы момант можна ўяўляць, як зрываешся на выхадных у Парыж ці Прагу па танных квітках Wizz Air (няхай нават ніколі гэтага не зробіш). Як прынята казаць, адчуваеш сябе нішавым.

Кацярыну на аснове статыстыкі і вопыту папрасілі скласці топ-3 еўрапейскіх пасольстваў, якія нешта падобнае могуць вам забяспечыць — з нюансамі, але ўсё ж.

«На першае месца можна паставіць італьянскае пасольства — пры ўмове, калі ў вас ёсць добрая візавая гісторыя. А што такое візавая гісторыя? Гэта не проста колькасць віз у пашпарце, але і якасць іх выкарыстання.

У выпадку з італьянскай, адпаведна, пацвярджэнні паездак у Італію. Пры іх наяўнасці часцей за ўсё ставяць «шэнген» на 1, 2 або 3 гады. У чысты пашпарт — ад 3 да 6 месяцаў. Віза на даты паездкі — хутчэй рэдкасць. Адмоў за апошні год, калі браць статыстыку па нашых кліентах, наогул не было. У цэлым яны сустракаюцца, але ў асноўным у беспрацоўных, якія прадставілі выпіску з банка з занадта малой рэштай на рахунку.

Другое месца я б усё ж такі аддала нямецкаму пасольству, нягледзячы на шматлікія размовы пра тое, што яно стала даваць візы горш, чым раней. Такое можа быць, аднак, зноў жа, трэба глядзець на візавую гісторыю канкрэтнага чалавека. Калі ў гэтым плане ўсё добра, то немцы ўсё яшчэ могуць паставіць «шэнген» на 1 або 2 гады. Тры па турызме — значна радзей, чым у італьянцаў. У чысты пашпарт — пад паездку альбо да трох месяцаў. Але час чакання запісу ўжо расцягнуўся да двух гадоў — за гэты час, вядома ж, многае можа памяняцца.

Ну і на трэцяе месца я б паставіла французскае пасольства. З добрай візавай гісторыяй там таксама могуць паставіць турыстычны «шэнген» на тэрмін ад 6 месяцаў да 3 гадоў».

«Прыз глядацкіх сімпатый» дырэктарка візавага агенцтва аддае пасольству Польшчы. Пра гэта рэдка згадваюць, але палякі ўсё яшчэ выдаюць турыстычныя візы. Праўда, з істотным прыярытэтам па заяўніках з канкрэтных абласцей Беларусі. З прапіскай у Гродзенскай або Брэсцкай (прычым не свежай, а ад паўгода) цалкам рэальна злавіць «шэнген» нават на 5 гадоў — зноў жа, з добрай візавай гісторыяй і штампамі аб перасячэнні польскай мяжы. Астатнім, на жаль, не варта спадзявацца на нешта большае, чым «аднаразоўка» пад паездку (гэта пры ўмове, што наогул удасца запісацца, з гэтым усё, мякка кажучы, вельмі складана).

«Рэч у тым, што ў розных акругах — розныя консулы, і разглядаюць дакументы яны таксама па-рознаму. Хутчэй за ўсё, у Брэсцкай і Гродзенскай акругах зыходзяць з логікі, што гэтыя вобласці прымежныя, а значыць, у людзей сапраўды ў прыярытэце наведванне менавіта Польшчы».

Што наконт «цёмных конікаў» — Румынія, Данія і астатнія?

Пра існаванне «сакрэтных» пасольстваў і візавых цэнтраў, якія чыста тэхнічна таксама выдаюць «шэнгены», нядаўна нагадваў тэлеграм-канал «Візавы крот». Інсайдар прыводзіў у прыклад Фінляндыю, Нарвегію і Данію. Тут жа агаворваўся: працэнт адмоў там найвышэйшы, нешта пад даты паездкі дадуць толькі тым, у каго ёсць вельмі важкія прычыны трапіць канкрэтна ў гэтыя краіны.

Румынія пасля двухмесячнага перапынку таксама аднавіла выдачу віз беларусам. На дзіва, пазітыўных кейсаў з яе атрыманнем хапае. Толькі хвалілі людзі ў асноўным не тэрміны чакання запісу (некалькі месяцаў) ці саміх віз (на жаль, «аднаразоўкі» ці нешта накшталт месяца), а падыход румынаў: з усімі заяўнікамі размаўляе асабіста консул, якога апісваюць як прыемнага і ветлівага мужчыну.

«Румынія ўваходзіць у шэнгенскую зону, але гэта відавочна не тая краіна, якая збіраецца выдаваць шматразовыя візы, — пацвярджае Кацярына Сігейкіна. — Румыны правяраюць наведванне сваёй краіны: трэба засяляцца ў той гатэль, бронь якога вы падалі пры падачы. Потым, вядома, можна паехаць і ў іншую краіну Шэнгену, але даехаць да Румыніі прыйдзецца ў любым выпадку.

У той жа Даніі свабодны запіс, пайсці падавацца можна ў любы момант. Краіна незапатрабаваная, у тым ліку таму, што візы яны таксама выдаюць толькі пад паездку, плюс дастаткова высокая рызыка адмовы (нават з запрашэннем ад блізкіх). У гэтым кірунку варта думаць, толькі калі ўсур’ёз збіраецеся наведаць краіну, а не проста патрэбен «шэнген».

Асобна спыталі Кацярыну пра новую аўтаматызаваную сістэму кантролю EES, якую ў Шэнгенскай зоне канчаткова ўвялі 10 красавіка. Паколькі яна прадугледжвае сканаванне толькі біяметрычных даных (вашы фота і адбіткі пальцаў больш нікому не патрэбныя), у тым жа Threads пайшлі чуткі, што ўладальнікі звычайных пашпартоў стаяць каля аконца кантролю па некалькі гадзін. Аэрапортаў гэта нібыта таксама тычыцца, маўляў, людзей са старымі дакументамі не паспеюць аформіць на рэйсы.

«Я пра гэта таксама чытала, але афіцыйнай інфармацыі, што беларусаў будуць пускаць толькі з біяметрычнымі пашпартамі, пакуль няма, — абвяргае экспертка. — Усе спакойна атрымліваюць візы з любымі пашпартамі, запытваюць іх у тым ліку на лета. Пра тое, што трэба тэрмінова замяніць дакумент, інакш вы не зможаце выехаць, у пасольствах і візавых цэнтрах не кажуць. У нас афіцыйна дзейнічаюць пашпарты двух фарматаў, з абодвума можна падарожнічаць без праблем. Калі б нейкія праблемы былі, мы б ужо ведалі і папярэджвалі б кліентаў».

«Немцы парэзалі тэрміны»

У колькі цяпер у сярэднім абыдзецца атрыманне візы пры дапамозе агентаў? Для самых хуткіх і даступных варыянтаў (зноў жа, Грэцыя і Іспанія) Кацярына называе сумы прыкладна ад 500 да 1200 рублёў у залежнасці ад тэрмінаў і наяўнасці опцыі падачы ў прэміум-зале.

Увогуле, у гэтым плане нейкіх асаблівых адкрыццяў няма: хуткая і лёгкая віза цяпер — гэта таксама раскоша. Доўгая і складаная — у прынцыпе таксама. Для тых, хто па-ранейшаму не хоча развітацца з успамінамі сямігадовай даўніны, калі ад двухгадовага «шэнгену» адгароджвалі толькі ўласная лянота і нежаданне развітацца з пашпартам аж на цэлы тыдзень, сабралі некаторыя звесткі пра самастойныя падачы.

Самае даступнае пасольства — усё яшчэ нямецкае. Там не прымушаюць ламаць галаву над слотамі, ботамі і нумаркамі ў чэргах: увёў даныя на сайце — і чакай. Калі зрабіць гэта проста цяпер, то, хутчэй за ўсё, да 2028 года.

Пра тое, ці варта гэтая пакутная гульня высілкаў, «Анлайнер» распытаў Іллю, аднаго з адміністратараў «нямецкага» візавага чата: цяпер гэта адна з самых актыўных суполак-памочніц (у чаце больш за 32 тысячы чалавек), якая апошнія некалькі гадоў старанна дакументуе статыстыку не толькі па візавым аддзеле пасольства ў цэлым, але і па канкрэтных консулах.

«Апошнім часам немцы парэзалі тэрміны. Маёй маме па запрашэнні ад роднай сястры пасля пяцігадовай візы далі на тры месяцы, — дзеліцца суразмоўца. — Пацверджанні па паездках не прынялі, хоць у афіцыйным запрашэнні была напісаная ступень сваяцтва. Таму цяпер усім рэкамендую збіраць дакументы, якія пацвярджаюць сваяцтва, і прыкладаць іх падчас падачы. Тым, хто так зрабіў, далі візы на 2 гады і больш. Было пару прастрэлаў па турызме на 2—3 гады. А так у асноўным даюць «мульцікі» на 3 месяцы.

Насамрэч, нічога новага: раз на паўгода ў немцаў мяняецца настрой. Яны адкрыта кажуць: людзі нашы візы выкарыстоўваюць для паездак у Польшчу і Літву, таму даваць на вялікія тэрміны няма сэнсу. Такіх, дарэчы, і праўда большасць з-за простай сістэмы запісу. На жаль, скончыўся час спадара Вазіха, калі ён даваў візы ад года ў чысты пашпарт».

Ілля мяркуе, што ў плане тэрмінаў дзеяння віз сітуацыя можа крыху палепшыцца да лета. Па тэрмінах чакання ж ніякіх пазітыўных зрухаў пакуль не назіраецца: нават маючы на руках запрашэнне ад сяброў, чарга да акенца ў пасольстве падыдзеце не раней, чым праз паўтара года. Без яго, як ужо казалася, плюс-мінус праз два.

«Калі запрашаюць блізкія сваякі, то дату падачы могуць прызначыць і праз два тыдні — у гэтым плане варта сказаць немцам дзякуй, што ідуць насустрач. На дзелавую візу можна падацца праз 3—6 месяцаў. Але цяпер сталі больш уважліва ставіцца да праверкі мэты атрымання візы пры запісе. Ужо было пару выпадкаў, калі не прымалі дакументы або ставілі адмову».

«У грэкаў шмат людзей і крыху вэрхалу»

Статыстыку Іллі пацвярджае адна з чытачак, якая нядаўна атрымала нямецкі «шэнген» на 3,5 месяца пасля двух гадоў чакання. Беларуска не хавае: расчараваная, спадзявалася на большы тэрмін, улічваючы тое, што ў Германіі яна раней сапраўды была (праўда, не па нямецкай візе — верагодна, гэта згуляла ў мінус) і прыкладала ўсе пацвярджэнні пры падачы. Кажа, што суцяшае толькі тое, што хутка будзе падавацца яшчэ раз, ужо да італьянцаў — сваёй чаргі жанчына чакала з канца 2024 года.

Так, факт пра самае лаяльнае еўрапейскае пасольства, які расчароўвае, заключаецца ў тым, што трапіць самастойна туды звычайнаму турысту (без дзелавых сувязяў і блізкіх сваякоў — з гэтым усё прасцей) у найбліжэйшыя паўтара года, як і да немцаў, немагчыма. З 1 мая італьянцы «пераязджаюць» з візавага цэнтра TLScontact у знаёмы ўсім VFS Global, аднак скептыкі лічаць, што сітуацыю гэта моцна не палепшыць, а то і пагоршыць. Калі вам цяпер трапляюцца рылсы нейкіх шчасліўчыкаў, якія распакоўваюць той самы італьянскі «шэнген» на тры гады, то яны, хутчэй за ўсё, проста цярпелі з 2024-га, запісаўшыся яшчэ ў «сшытак Алега».

«У журнал жывой чаргі на Нямізе мы запісваліся яшчэ ў жніўні 2024-га, — расказвае адзін з такіх шчасліўчыкаў па імені Уладзіслаў. — Нам прысвоілі нумар, з якім ты можаш падавацца хоць у той жа дзень пры ўмове, што ў чарзе не будзе чалавека з нумарам меншым, чым у цябе. Пакет дакументаў стандартны: анкеты, даведка з працы, выпіска з банка, дакументы на аўтамабіль (меркавалася, што паездка будзе на аўто), броні гатэляў, страхоўкі. Для дзіцяці — спонсарскі ліст. Прыехалі да візавага цэнтра і трапілі на поўную адсутнасць людзей: мы былі адзіныя, хто ў той дзень падаваўся на візу. Праз два тыдні пашпарты былі ў нас. Вынік: мне — першая віза на 6 месяцаў, жонцы і дзіцяці — па 2 гады (у іх паўторныя)».

Вікторыя таксама станавілася ў чаргу на візу ў кастрычніку 2024 года, але свайго запісу так і не дачакалася. Даведаўшыся пра хуткі пераход на новы візавы цэнтр, дзяўчына на ўсялякі выпадак вырашыла не марудзіць і скарысталася опцыяй «рэгіянальных дзён», якія вылучала італьянскае пасольства для людзей без мінскай прапіскі. Вікторыя і яе мама ездзілі падавацца з Гродна 25 студзеня і 23 лютага.

«Усе дакументы рабілі самастойна, паслугамі агентаў не карысталіся. Жыллё браніравалі проста праз Booking, авіябілеты купілі за €15 па акцыі ў Wizz Air. У нас ужо да гэтага былі італьянскія візы, пацвярджэнні знаходжання прыкладалі, хоць яны не абавязковыя — толькі павялічваюць шанец на больш доўгі тэрмін візы. Першы «шэнген» у мяне быў на год, другі — на два, цяпер далі на тры. У мамы быў першы таксама на год, цяпер другі далі на два».

Яшчэ адной гісторыяй самастойнага атрымання візы падзялілася Таццяна. Нядаўна яна вырашыла зрабіць той самы хуткі грэчаскі «шэнген» без дапамогі агенцтваў — сэканоміла, але не моцна: у візавым цэнтры ўсё адно прыйшлося патраціць дадатковыя грошы, а самае галоўнае — нервы.

«Запіс самому зрабіць нескладана: у лютым грэкі выкідвалі на сайце даты на сакавік, адну з іх я злавіла. У візавым цэнтры было вельмі шмат людзей, запісаных на адзін і той жа час, і крыху вэрхалу. Чакаць прыйшлося гадзіну — у параўнанні з хуткай падачай у немцаў гэта неба і зямля. Далей было адно раздражненне. Спачатку не падышло фота, зробленае месяц таму, прымусілі платна рабіць іншае ў фотабудцы.

Наогул, дадатковыя платныя паслугі там прапануюць пастаянна: то за СМС, то за кур’ера, які прывязе дакументы (прычым, калі падаецеся ў пары, плаціць трэба асобна за кожны пашпарт, нават калі прывязуць потым у адно месца). У анкеце, вядома ж, знаходзяць памылкі і прапануюць іх выправіць — таксама платна.

Па дакументах: уважліва глядзяць квіткі. У мяне быў пералёт з Познані, прасілі паказаць квіткі туды-назад. Бронь гатэля ў Грэцыі рабіла праз Booking. Візу адкрылі пад паездку, ні дня лішняга не падарылі. Каштавала гэта €65 (плюс дадатковыя паслугі). Але калі вельмі хочацца паехаць туды, куды запланаваў, любыя перашкоды нішто».

Каментары да артыкула