Падлеткам дазволілі працаваць трактарыстамі на вёсцы
Міністэрства працы і сацыяльнай абароны паведаміла пра карэктаванне пераліку забароненых для падлеткаў работ. Згодна з пастановай №19 ад 9 красавіка 2026 года, са спісу забароненых работ выключылі прафесію «трактарыст-машыніст сельскагаспадарчай вытворчасці».
Здымак ілюстрацыйны. Фота: «Наша Ніва»
Гэта рашэнне прынялі таму, што арт. 25 закона «Аб дарожным руху» дазваляе з 17 гадоў атрымліваць права кіравання колавым трактарам і самаходнай машынай катэгорый A, B, C, F.
«На практыцы ўзнікла сітуацыя, калі выпускнікі прафтэхвучылішчаў, якія не дасягнулі васямнаццаці гадоў, ужо маюць пасведчанне трактарыста-машыніста, але не могуць працаваць па спецыяльнасці. Каб ліквідаваць гэтую супярэчнасць і пашырыць магчымасці працаўладкавання падлеткаў, забарона знятая», — патлумачылі ў міністэрстве.
Акрамя таго, для трох прафесій павысілі мінімальны разрад выканання работ, з якога забаронена праца непаўналетніх — з другога на трэці. Гэта закране прафесіі брашуроўшчыка, пераплётчыка, слесара па рамонце сельскагаспадарчых машын і абсталявання.
«Павышэнне разраду звязана з тым, што пры выкананні работ па другім разрадзе па гэтых прафесіях адсутнічаюць фактары павышанай небяспекі, напрыклад, адкрытыя элементы, якія рухаюцца ці круцяцца, перавышэнне нормаў па перамяшчэнні і пад’ёме цяжараў уручную. А вось пры выкананні работ па трэцім разрадзе і вышэй такія фактары прысутнічаюць», — адзначылі ў ведамстве.
Асноўныя палажэнні пастановы набываюць моц з 26 красавіка.
Чытайце таксама:
«Апошні трактар забярэ банк». Як фермер пабудаваў унікальны бізнэс, але праз 30 гадоў усё страціць
МАРГ праверыла прадаўцоў кветак і знайшло шмат парушэнняў
Стала вядома, на якіх умовах пакістанскія рабочыя будуць працаваць у Беларусі