Навапалачанін завербаваўся ў расійскае войска і паехаў ваяваць. Цяпер яго шукае дачка
Жыхарка Наваполацка Аляксандра Багданава (Слоціна) размясціла відэазварот адносна пошуку свайго бацькі — 56‑гадовага грамадзяніна Беларусі Дзмітрыя Слоціна, заўважыў тэлеграм-канал «Витебск, я гуляю!»
Дзмітрый Слоцін
У падмаскоўным Нагінску мужчына падпісаў кантракт з расійскай арміяй, праходзіў службу ў 11‑й роце 4‑га батальёна, 1‑м мотастралковым палку.
4 студзеня гэтага года ён апошні раз выходзіў на сувязь, з 29 студзеня лічыцца зніклым без вестак.
Дачка звярнулася ў розныя расійскія дзяржаўныя органы — Мінабароны, СК, вайсковую паліцыю, вайсковую пракуратуру. Ёй не адказалі ва ўстаноўленыя тэрміны, і цяпер яна мае намер падаць заяву на бяздзейнасць расійскіх органаў.
Раней Дзмітрый Слоцін працаваў на наваполацкім «Нафтазаводмантажы», а апошнім часам, мяркуючы з усяго, у Расіі.