Банкі будуць перадаваць падаткавым органам звесткі пра пераводы фізічных асоб за мяжу
У Беларусі змянілі парадак прадстаўлення звестак аб даходах фізічных асоб. Адпаведную пастанову Савета міністраў падпісаў прэм’ер-міністр Аляксандр Турчын, паведамляе прэс-служба ўрада, піша smartpress.by.
Фота: Lookby.Media
Дакумент, у прыватнасці, устанаўлівае новы абавязак для банкаў: яны будуць штоквартальна перадаваць звесткі пра грашовыя сродкі, якія фізічныя асобы пералічваюць за мяжу.
Цяпер банкі ўжо перадаюць падаткавым органам частку звестак па аперацыях фізічных асоб — напрыклад, пра паступленні з-за мяжы і пра рахункі з вялікімі прыходнымі абаротамі.
Таксама пастановай вызначаны тэрміны прадстаўлення звестак аб даходах фізічных асоб арганізацыямі, у дачыненні да якіх ужываецца працэдура ліквідацыйнай вытворчасці.
Яшчэ адно змяненне датычыцца падаткавых агентаў. Для іх прадугледжаны паэтапны пераход з гадавога на штоквартальнае прадстаўленне звестак аб даходах фізічных асоб. Такі парадак пачне прымяняцца з 2027 года.