У Нідэрландах сорт цюльпанаў назвалі «Мінск»: высокія, самавітыя
Сцябло расліны дасягае паўметра, а сама кветка — 7 сантыметраў. А што з афарбоўкай?
Цюльпаны сорту «Мінск». Фота: yaskrava.com.ua
Гісторыя цюльпана, які носіць імя беларускай сталіцы, пачалася ў галандскім горадзе Крэйл. Менавіта там спецыялісты фірмы Sylvestris B.V. вывелі новы гатунак, які пазней увайшоў у элітную групу «Трыумф».
Афіцыйны адлік свайго існавання ў міжнародных рэестрах кветка вядзе з 28 верасня 2010 года — менавіта тады за гатункам была афіцыйна замацавана назва Minsk. Пазней, у 2017 годзе, пасля паспяховых выпрабаванняў і размнажэння, гатунак атрымаў поўную юрыдычную абарону ў Нідэрландскім рэестры сартоў пад нумарам 40920, а яго праваўладальнікам стала кампанія J.A. Borst Bloembollen B.V. з горада Обдам.
Адпаведна афіцыйнаму батанічнаму апісанню, «Мінск» — гэта двухколерны цюльпан. Асноўны колер пялёсткаў — насычаны чырвоны (адценні 45B і 46B па міжнароднай шкале), які бліжэй да краёў плаўна пераходзіць у аранжава-чырвоны, а завяршаецца выразнай сонечна-жоўтай аблямоўкай. Такая двухколернасць робіць бутон заўважным здалёк.
Моцнае зялёнае сцябло цюльпана дасягае 50 сантыметраў у вышыню, а сама кветка можа дасягаць 7 сантыметраў. Гарманічны выгляд расліны завяршае вузкае яйкападобнае лісце, канчыкі якога маюць лёгкае фіялетавае адценне — такое ж, як і ў верхняй частцы сцябла.
Цюльпан сорту «Мінск». Здамак з сайта Каралеўскай агульнай асацыяцыі вытворцаў цыбульных раслін (iergewassen.kavb.nl)
Акрамя прыгажосці, сорт «Мінск» мае і важнае практычнае значэнне: ён лічыцца вельмі «жывучым». Вытворцы падкрэсліваюць, што ў зрэзаным выглядзе гэты цюльпан захоўвае свежасць і форму нашмат даўжэй за іншыя сарты, нават калі букет стаіць у светлым пакоі пад сонечнымі прамянямі.
Цыбуліны гэтага гатунку можна набыць і ў Беларусі. Паводле аднаго з сайтаў, пры замове ад 300 штук кошт адной складае 1 рубель 39 капеек.
Чытайце таксама:
Як захаваць букет цюльпанаў да 10 дзён. Карысныя парады