Расійскія дроны ўдарылі па Адэсе і Адэскай вобласці, ёсць ахвяры
Уночы 3 мая расійскія войскі зноў атакавалі Адэсу і Адэскую вобласць беспілотнікамі. Пад ударам апынуліся партовая і гарадская цывільная інфраструктура.
Фота: Пракуратура Украіны
Па інфармацыі мясцовай пракуратуры, у выніку атакі загінулі два чалавекі, яшчэ пяцёра атрымалі раненні.
У двух населеных пунктах часткова разбураныя пяць прыватных жылых дамоў. Таксама пашкоджаная партовая інфраструктура. Пажар, які ўзнік пасля ўдару, удалося хутка патушыць.
Фота: Пракуратура Украіны
Паветраныя сілы Украіны паведамілі, што ўсяго за ноч па тэрыторыі краіны былі выпушчаныя адна балістычная ракета «Іскандэр-М» і 268 ударных беспілотнікаў. Паводле іх даных, сродкі СПА збілі 249 дронаў.
Таксама зафіксаваныя траплянні ракеты і 19 беспілотнікаў у 15 месцах, яшчэ ў адным месцы ўпалі абломкі збітых цэляў.
Акрамя Адэскай вобласці, пад атакамі гэтай ноччу знаходзіліся таксама Харкаўская, Днепрапятроўская, Запарожская і Сумская вобласці.
Апошнім часам расійскія ўдары па Адэсе і рэгіёне адбываюцца рэгулярна. Папярэднія атакі беспілотнікаў былі 30 красавіка, а таксама 1 і 2 мая.
Чытайце таксама:
Украінскія дроны зноў атакавалі порт у расійскім Прыморску
Упершыню за доўгі час падчас атакі беспілотнікаў загінуў жыхар Падмаскоўя
Расіяне ўдарылі дронам па маршрутцы ў Херсоне. Двое загінулых
У Харкаве абломкі шахеда заляцелі на кухню ў кватэру на 12‑м паверсе і не здэтанавалі ФОТАФАКТ