Швецыя запусціць дзесяць вайсковых спадарожнікаў для разведкі ў Расіі
Швецыя вывела на арбіту свой першы ўласны вайсковы спадарожнік.
Фота: Узброеныя сілы Швецыі
Найбліжэйшыя два гады краіна плануе разгарнуць каля дзесяці апаратаў, якія будуць выкарыстоўвацца для разведкі каля расійскіх межаў і назірання за вайсковай актыўнасцю ў рэгіёне, паведамляе шведскі тэлеканал SVT.
«Новы спадарожнік узброеных сіл з’яўляецца часткай вайсковай касмічнай праграмы», — гаворыцца ў паведамленні Узброеных сіл Швецыі. Стакгольм цяпер можа самастойна выяўляць і аналізаваць пагрозы ў глабальным маштабе.
Запуск адбыўся ў нядзелю з авіябазы Вандэнберг у Каліфорніі. Яго выканала кампанія SpaceX Ілана Маска.
Кіраўнік касмічнага напрамку шведскіх узброеных сіл Андэрс Сундэман назваў запуск важным крокам.
«Мы атрымліваем магчымасць самі кантраляваць і прыярытэтна вызначаць разведку на вялікіх адлегласцях. Гэта сур’ёзнае ўзмацненне магчымасцяў», — сказаў ён.