Кіраўніца «Вольнага хору» Галіна Казіміроўская сутыкнулася з цяжкай хваробай. За суткі ёй амаль сабралі вялікую суму, не хапае зусім крыху
Учора Галіна Казіміроўская расказала на «Байсоле» пра тое, што мае анкалогію, і зараз не мае магчымасці аплачваць арэнду кватэры, купляць базавыя прадукты і аплачваць дарагія лекі. Неабходна сабраць 8500 еўра.
«Імя Галіны Казіміроўскай стала для многіх беларусаў сінонімам мужнасці. Сёння Галіна, якая перажыла арышт, допыты, суткі на Акрэсціна і вымушаную эміграцыю, сутыкнулася з ворагам, якога нельга перамагчы песняй, — з анкалогіяй. У 2020 «Вольны хор» ператварыў музыку ў значны інструмент мірнага пратэсту. Пад скляпеннямі гандлёвых цэнтраў і на прыступках філармоній сотні галасоў спявалі аб свабодзе, пакуль рэжым не прызнаў калектыў «экстрэмісцкім фармаваннем». Галіна з сям’ёй вымушана была з’ехаць у эміграцыю, як і шмат хто, з удзельнікаў хору, ад палітычнага пераследу. (…)
Нягледзячы на каласальную занятасць, гэтая дзейнасць амаль не прыносіла Галіне даходу. Адзінай крыніцай сродкаў для жыцця былі прыватныя ўрокі вакалу. Але ў пачатку гэтага года ўсё змянілася.
Дыягназ «анкалогія» стаў для Галіны тым выпрабаваннем, якое патрабуе нашай дапамогі і падтрымкі. Прайшоўшы праз шок і адмаўленне, яна прыняла выклік і змагаецца з хваробай з усіх сіл. Зараз яна праходзіць курс хіміятэрапіі, наперадзе аперацыя і яшчэ курсы хімія– і радыетэрапіі.
Кожны курс хіміятэрапіі — гэта знясільваючая бітва. На кожнае аднаўленне сыходзіць некалькі дзён, і толькі ты адужваеш, як новая доза моцных прэпаратаў пазбаўляе цябе сіл. У такім стане Галіна не можа працаваць, і на цяперашні момант у яе проста няма грошай на базавыя патрэбы сям'і — аплату жылля, харчаванне, а з двума непаўналетнімі дзецьмі гэтыя выдаткі моцна не скароціш.
Хіміятэрапія моцна паўплывала на стан здароўя ў цэлым. Таксічнасць хіміі разбурае печань і іншыя органы, пагаршае агульны стан і нясе з сабою шмат болю. На працягу ўсяго лячэння патрэбны даволі дарагія лекі, якія дапамагаюць падтрымліваць арганізм, змяншаюць моцны боль.
Галіна прывыкла разлічваць толькі на сябе. Але зараз яна апынулася ў безвыходнай сітуацыі: хвароба пазбавіла яе магчымасці выкладаць, а гэта азначае — пазбавіла сродкаў на існаванне.
У яе няма магчымасціаплачваць арэнду кватэры, купляць базавыя прадукты і аплачваць дарагія лекі для аднаўлення арганізма паміж курсамі хіміі. Каб працягваць лячэнне і перамагчы рак, Галіне патрэбна падтрымка на найбліжэйшыя 6 месяцаў», — паведамляў «Байсол».
Сума збору была €8500:
- €6300 — арэнда кватэры на 6 месяцаў + камуналка
- €1700 — прадукты харчавання на 6 месяцаў
- €500 — лекі
За суткі, па стане на 10:30 раніцы серады, сабрана ўжо 9 000 еўра.