У калоніі памёр асуджаны за хабар дырэктар Cкідзельскага цукровага камбіната
Дзмітрый Ягораў атрымаў 11 гадоў калоніі. Яго не выпусцілі нават перад смерцю, ведаючы, што ён памірае ад анкалогіі.
Дзмітрый Ягораў. Ён кіраваў заводам у 2006‑2020 гадах
У папраўчай калоніі №1 у Наваполацку памёр Дзмітрый Ягораў, былы дырэктар Скідзельскага цукровага камбіната. Пра гэта даведаўся «Флагшток» ад аднаго з былых вязняў.
За атрыманне хабару Ягораў быў асуджаны ў 2021 годзе на 11 гадоў пазбаўлення волі па так званай «цукровай справе». Паводле інфармацыі крыніцы, у зняволенага была анкалогія, яго накіроўвалі ў турэмны рэспубліканскі шпіталь, але медыкі не змаглі выратаваць жыццё мужчыны.
«Не выпусцілі нават перад смерцю, ведаючы, што ён памірае. Бо з нявыплачанымі пазовамі не вызваляюць, хоць паводле закона смяротна хворых можна вызваляць», — адзначыў суразмоўца.
Паводле ягоных слоў, 7 мая цела памерлага плануюць забраць з калоніі.
Дзмітрый Ягораў злева