Меркель назвалі яшчэ адным верагодным пасярэднікам на перамовах Расіі і Украіны
Паводле даных Spiegel, за кулісамі палітычных колаў абмяркоўваецца ідэя, што на ролю пасярэдніка магла б падысці былая канцлерка Германіі Ангела Меркель. Яна размаўляе па-руску, асабіста знаёмая з Зяленскім і Пуціным, а таксама ўжо дастаткова доўга знаходзіцца ў адстаўцы.
Фота: Annegret Hilse, Pool Photo via AP
Пасля таго як Пуцін прапанаваў у якасці пасярэдніка былога канцлера Шродэра, у Еўрасаюзе не сціхаюць дыскусіі наконт магчымых перамоў — з улікам няўдалага досведу пасярэдніцтва ЗША, ЕС гэтым разам хоча сядзець за сталом перамоў. Галоўная дыпламатка Еўропы Кая Калас заявіла, што было б «не вельмі разумна» дазваляць Крамлю дыктаваць кандыдатуру перамоўшчыка, піша Bild.
Кіраўнік Мюнхенскай канферэнцыі па бяспецы Вольфганг Ішынгер выказаўся больш стрымана: хто б у выніку ні стаў пасярэднікам, ён павінен атрымаць «шырокае адабрэнне на еўрапейскім узроўні, асабліва з боку Усходняй Еўропы і краін Балтыі».
Будучы кіраўніцай урада, Меркель, нягледзячы на рэзкую крытыку з боку Польшчы і краін Балтыі, прасоўвала праект газаправода «Паўночны паток 2». Акрамя таго, яна адыгрывала ключавую ролю ў Мінскіх пагадненнях 2014 і 2015 гадоў, якія ў выніку не змаглі прадухіліць расійскае ўварванне ў 2022 годзе.
Офіс Меркель паведаміў Spiegel, што «ніякіх запытаў да былой федэральнай канцлеркі» адносна ролі пасярэдніка пакуль не паступала. Аднак на пытанне, ці магла б яна ўявіць сябе ў такой ролі, абвяржэння не прагучала.