Украінскія вайскоўцы ўпершыню прынялі ўдзел у парадзе да Дня ўзяцця Бастыліі ў Парыжы
У Парыжы прайшоў штогадовы вайсковы парад з нагоды Дня ўзяцця Бастыліі. Сёлета на Елісейскіх палях упершыню маршыравалі ўкраінскія вайскоўцы, а ў небе над французскай сталіцай праляцелі ўкраінскія пілоты, піша «Суспільне».
Фота: AP Photo / Michel Euler
Наземную частку парада адкрылі каля 500 вайскоўцаў з краін-членаў «Кааліцыі ахвотных», якая падтрымлівае Украіну ў вайне.
Менавіта ў складзе гэтага аб'яднання ўкраінскія салдаты ўпершыню прайшлі маршам па галоўным праспекце Парыжа.
Адначасова з гэтым у авіяшоў прынялі ўдзел пілоты Паветраных сіл ЗСУ. Яны праляцелі над Парыжам на французскіх знішчальніках Mirage у складзе Нацыянальнай пілатажнай групы Паветрана-касмічных сіл Францыі.
Цяпер украінскія лётчыкі праходзяць навучанне на гэтых самалётах.
За парадам назіралі прэзідэнт Францыі Эмануэль Макрон, а таксама каля 30 кіраўнікоў дзяржаў і ўрадаў. Сярод запрошаных гасцей на трыбунах прысутнічалі прэзідэнт Украіны Уладзімір Зяленскі і першая лэдзі Алена Зяленская.