Рубіа на сустрэчы з Лаўровым казаў пра неабходнасць сканчэння вайны ва Украіне
Паводле слоў чыноўніка, для дасягнення міру патрэбныя новыя ідэі.
Фота: Brendan Smialowski/Pool AFP via AP
Дзяржсакратар ЗША Марка Рубіа заявіў, што на сустрэчы з расійскім калегам Лаўровым на Філіпінах абмеркаваў неабходнасць завяршыць вайну супраць Украіны, піша РБК-Украіна.
Паводле слоў чыноўніка, для дасягнення міру патрэбныя «новыя ідэі», паколькі папярэднія прапановы былі «непрымальнымі для Украіны».
«Я не думаю, што яны былі б прымальныя для яе і цяпер; больш за тое, верагодна, яны былі б яшчэ менш прымальнымі», — сказаў Рубіа.
На яго думку, калі мір і наступіць, то гэта адбудзецца дзякуючы нейкім новым ідэям і новым канцэпцыям.
«Мы гатовыя прапанаваць некаторыя з іх у адпаведным кантэксце і форме, калі з’явіцца такая магчымасць і будуць спрыяльныя ўмовы. Мы гатовыя адыгрываць гэтую ролю ў пазітыўным ключы», — дадаў дзяржсакратар.