Сузаснавальнік бюро Zrobim architects, які жыве ў ЗША, прадае сваю долю ў бізнэсе
Другі сузаснавальнік толькі нядаўна выйшаў з СІЗА.
Аляксей Караблёў. Фота: probusiness.io
Сузаснавальнік вядомага архітэктурнага бюро ZROBIM architects Аляксей Караблёў, які жыве ў ЗША, прадае сваю долю ў бізнэсе.
Пра гэта расказаў у інстаграме другі сузаснавальнік бюро Андрэй Макоўскі (Андрусь Bezdar), які нядаўна выйшаў з СІЗА.
Аляксей Караблёў — архітэктар, атрымаў шмат дызайнерскіх і архітэктурных узнагарод. Бюро яны з Макоўскім заснавалі ў 2011 годзе.
***
Пераслед кіраўніцтва і супрацоўнікаў ZROBIM architects пачаўся ў красавіку 2026 года. Тады сілавікі затрымалі каля 50 чалавек, а само папулярнае архітэктурнае бюро абвінавацілі ў атрыманні «няўлічанага прыбытку» на суму 6 мільёнаў даляраў і выплаце заробкаў у канвертах. Агульную шкоду бюджэту ацанілі больш як на 5 мільёнаў рублёў.
Сам Андрэй Макоўскі застаўся пад вартай.
У чэрвені 2026 года ў ягоных сацсетках з’явілася аб’ява аб продажы недабудаванай вілы на тайландскім востраве Пхукет у элітным комплексе Botanica Pru Jampa, а ў ліпені — надзела пад турыстычны комплекс на беразе Вілейкі.
5 жніўня стала вядома, што Андрусь Бездар выйшаў з СІЗА.