Узламалі закінуты праваабарончы сайт «Палеская вясна»
Раніцай 18 жніўня тэлеграм-каналы, звязаныя з сілавымі структурамі ў Беларусі, заявілі пра ўзлом сайта «Палеская вясна» і нібыта атрыманне доступу да паштовай скрынкі, якая была звязаная з адміністрацыйнай часткай сайта. Праваабарончы цэнтр «Вясна» пацвердзіў, што рэгіянальны сайт «Палеская вясна» сапраўды быў узламаны, і даў тлумачэнне сітуацыі.
У «Вясне» адзначылі, што сайт «Палескай вясны» не абнаўляўся амаль два гады і фактычна выкарыстоўваўся толькі як архіў старых матэрыялаў.
Праваабаронцы падкрэслілі, што гэты сайт і згаданая паштовая скрынка не былі звязаныя з цэнтральным рэсурсам арганізацыі — spring96.org, а таксама з іншымі інфармацыйнымі платформамі «Вясны».
Цэнтральны сайт, афіцыйныя электронныя скрынкі арганізацыі і звароты, якія праз іх дасылаюцца, паводле заявы «Вясны», знаходзяцца ў бяспецы.
Цяпер праваабарончы цэнтр высвятляе, што адбылося з паштовай скрынкай, пра якую заявілі сілавікі, і ці быў да яе атрыманы доступ.
«Вясна» таксама абвергла інфармацыю пра нібыта ўцечку фінансавых даных арганізацыі. Па словах праваабаронцаў, гэтыя заявы не адпавядаюць рэчаіснасці і з'яўляюцца спробай сілавых структур дыскрэдытаваць дзейнасць арганізацыі.
Праваабарончы цэнтр «Вясна» заявіў, што будзе і надалей паведамляць пра развіццё сітуацыі.
Чытайце таксама:
Наста Лойка: КДБ топіць, каб людзі заставаліся, МУС — каб з’язджалі