Будаўнікі метро скончылі работы пад рэчышчам Свіслачы

Будаўнікі завяршылі чарговы этап работ на трэцяй, Зялёналужскай лініі Мінскага метрапалітэна — пракладку ўчастка пад рэчышчам Свіслачы, паведаміў «Мінскбуд».

Фота: «Мінскбуд»

Работы пачаліся вясной 2026 года. Рэчышча ракі пры гэтым не асушалі: яго падзялілі на некалькі ўчасткаў, а будаўніцтва праводзілі паэтапна. У «Мінскбудзе» адзначылі, што работы не паўплывалі на саму раку.

Пад рэчышчам Свіслачы метрабудаўнікі паставілі маналітную жалезабетонную пліту памерам 41 на 25 метраў. Яе таўшчыня складае 50 сантыметраў, а канструкцыя мае ўхіл да цэнтра.

Пліта павінна абараніць будучыя тунэлі метро ад прасядання грунту і пранікнення вады. Самі тунэлі будуць праходзіць прыкладна на 8 метраў ніжэй за рэчышча Свіслачы.

Пасля завяршэння работ на месцы будаўніцтва амаль нічога не засталося з таго, што пра іх сведчыла — хіба што толькі абноўленыя схілы.

Фота: «Мінскбуд»

Каментары да артыкула