Месячная норма за два тыдні: самыя дажджлівыя гарады жніўня
Дзе ў Беларусі перавыканалі месячную норму дажджы, расказалі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды, піша Белта.
«У Гродзенскай, на большай частцы Віцебскай, а таксама ў асобных раёнах Мінскай і Брэсцкай абласцей на працягу месяца выпала больш за палову месячнай нормы ападкаў, а па асобных пунктах назіранняў у Віцебскай і Гродзенскай абласцях норма ападкаў за месяц і ўвогуле была перавышана», — расказалі ў Белгідрамеце.
Акрамя таго, кліматолагі расказалі, колькі ападкаў выпала з пачатку месяца на станцыях:
у Гродне — 71,7 мм (126% месячнай нормы),
Ваўкавыску — 72,2 мм (123% месячнай нормы),
Лепелі — 72,5 мм (104% месячнай нормы),
Віцебску — 84,9 мм (111% месячнай нормы),
Верхнядзвінску — 69,1 мм (101% месячнай нормы).