Паўднёвая Карэя адклікае пасла з Украіны
Урад Паўднёвай Карэі вырашыў адклікаць свайго пасла з Украіны на радзіму, паведаміла МЗС краіны. У ведамстве заявілі, што разлічваюць на ўрэгуляванне пытанняў паміж дзвюма краінамі і працягнуць кансультацыі з украінскім бокам, паведамляе «Дождь».
Сеул абвінавачвае Кіеў у тым, што той публічна паведаміў пра перадачу Паўднёвай Карэі двух паўночнакарэйскіх ваеннапалонных, хоць бакі дамовіліся трымаць гэта ў сакрэце, а затым ілжыва адмаўляў, што такая дамоўленасць была.
Украіна, як гаварылася ў заяве Сеула, неаднаразова абмяркоўвала з Паўднёвай Карэяй перадачу палонных і сама прасіла не раскрываць інфармацыю пра гэта, паколькі ў Кіеве асцерагаліся, што ўнутры краіны іх будуць папракаць ва ўпушчанай магчымасці абмяняць паўночнакарэйцаў на ўкраінцаў.
Паўднёвая Карэя пагадзілася на гэта, у тым ліку дзеля бяспекі саміх палонных і іх сем'яў. Аднак затым, гаварылася ў заяве, Зяленскі без дастатковых кансультацый распавёў пра перадачу ў сваім выступленні на Генеральнай асамблеі ААН, а ўкраінскі бок стаў адмаўляць, што дамоўленасць аб канфідэнцыйнасці існавала.
Пазней Украіна папрасіла прабачэння за тое, што раскрыла інфармацыю пра перадачу Паўднёвай Карэі палонных з КНДР, але ў Сеуле палічылі гэта недастатковым і паабяцалі «рашучыя меры».