Мінчанка скрала красоўкі і прыйшла ў іх у міліцыю
57‑гадовая жанчына забрала чужы абутак, бо ён ёй спадабаўся і падышоў па памеры. Цяпер распачатая крымінальная справа за крадзеж.
У Маскоўскае РУУС сталіцы звярнулася жыхарка раёна і паведаміла аб крадзяжы красовак з тамбура.
Падазраванай аказалася 57‑гадовая мінчанка.
Паводле міліцыі, яна гасцявала ў прыяцелькі ў тым жа пад’ездзе. Жанчына крыху выпіла, а калі спускалася на першы паверх, заўважыла адчыненыя дзверы ў тамбур. Яна зайшла ўнутр і забрала красоўкі.
Пазней мінчанка патлумачыла, што абутак ёй спадабаўся і падышоў па памеры. Калі яе запрасілі ў міліцыю для размовы, яна прыйшла ў тых самых красоўках.