«А дзе ўсе?» Белдзяржцырк шукае адразу 15 работнікаў. У каментарах — шапіто
Беларускі дзяржаўны цырк абвясціў вялікі набор супрацоўнікаў — патрэбныя як артысты амаль усіх асноўных цыркавых жанраў, так і тэхнічны персанал. Абвестка выклікала сотні жартаў пра тое, куды падзеўся ранейшы калектыў і хто мог бы замяніць усіх адразу.
Абвестку Белдзяржцырк размясціў у Threads 12 кастрычніка. За суткі яна набрала больш за паўтысячы каментароў.
Цырк шукае артыста-акрабата, дывановага артыста, дрэсіроўшчыка жывёл, наезніка, музычнага эксцэнтрыка, эквілібрыста, паветранага гімнаста і рэжысёра-пастаноўшчыка.
Гэта не ўсё. Таксама патрэбныя адміністратар мастацка-артыстычнага персаналу, вядучы эканаміст, рабочы па комплексным рамонце і абслугоўванні будынкаў, прыбіральшчык, ахоўнік, буфетчык і бутафор. Усяго — 15 спецыялістаў.
Незвычайны набор выклікаў у беларусаў галоўнае пытанне: а дзе ўсе папярэднія супрацоўнікі?
«У вас там што, увесь калектыў звольніўся?»
«Прабачце, а што сталася з папярэднімі артыстамі і асабліва з паветранымі гімнастамі?»
«Тыграў не было чым карміць?»
«Можна было проста напісаць: «У Беларускі дзяржаўны цырк патрабуюцца ўсе». Не допіс, а нейкі цырк, шчыра кажучы».
«Вось гэта дэмарш, такога страйку ніхто не ладзіў з 1917 года».
«Мы толькі набылі білеты на 1 лістапада. Калі вы шукаеце цэлы штат, то на каго мы будзем глядзець?»
Некаторыя заўважылі, што ў доўгім спісе няма вакансіі клоўна.
«Клоўн не патрэбны? Мой былы шукае працу».
«Цікава, што шукаюць усіх, акрамя клоўнаў. Наводзіць на думку, што цырк з’ехаў».
«Адчуваю, што ў вас кіраўніцтва — яшчэ тыя клоўны».
Знайшліся ў каментатараў і ўніверсальныя кандыдаты на пасады.
«Усебеларускі народны сход у поўным складзе».
«Спіс вакансій для любой школы».
«Бярыце любую выхавацельку з дзіцячага садка. Адной хопіць на ўсе пасады».
«Лукашэнка ў вас ужо ёсць — артыст і гаспадарнік. Прафесіянал ва ўсіх сферах, з жывёламі ладзіць, майстар і дывановых, і паддывановых спраў. Прыгледзьцеся. Ён проста рэзюмэ адпраўляць не ўмее».
«Ведаю такога чалавека: ён і хакеіст, і футбаліст, і гісторык, умее збіраць кавуны і разбіраецца ў вірусах. Клоўнам сябе не лічыць. У войску служыў, у цырку не смяецца. Ваш чалавек. Можа сядзець на некалькіх крэслах і ўмее сядаць на вялікі шпагат».