«Заходнія лібералы завезлі трэці свет у Францыю». Вэнс абвінаваціў мігрантаў у беспарадках
Віцэ-прэзідэнт ЗША Джэй Дзі Вэнс заявіў, што прычынай гвалту падчас пратэстаў у Францыі стала міграцыйная палітыка еўрапейскіх уладаў. Так ён пракаментаваў у сацсетцы X відэа пажару ў будынку мэрыі Ліможа.
Фота: AP Photo / Thibault Camus
«Заходнія лібералы завезлі ў Францыю і іншыя краіны выхадцаў з краін трэцяга свету пад лозунгамі разнастайнасці і спагады. Яны праігнаравалі фундаментальныя пытанні асіміляцыі і сумяшчальнасці. Іх папярэджвалі, што гэта да такога прывядзе, але яны не слухалі», — напісаў Вэнс.
Ён таксама выкарыстаў падзеі ў Францыі для крытыкі амерыканскіх дэмакратаў напярэдадні прамежкавых выбараў у Кангрэс, якія пройдуць 3 лістапада.
«Я спадзяюся, што амерыканцы звяртаюць на гэта ўвагу. Менавіта такую будучыню дэмакраты ў Кангрэсе хочуць для вашай краіны», — заявіў віцэ-прэзідэнт.
У Францыі праходзяць масавыя пратэсты супраць росту кошту жыцця і праблем у сістэме адукацыі. У шэрагу гарадоў адбыліся сутыкненні з паліцыяй, падпалы і рабаванні крам. У Ліможы пратэстоўцы падпалілі ратушу XIX стагоддзя.
Паводле французскіх уладаў, затрымалі каля 1200 чалавек, пацярпелі каля 150 паліцэйскіх.