«Да новай сустрэчы, наш мілы хлопчык. Мы будзем любіць цябе вечна». Сіндзі Кроўфард упершыню выказалася пра смерць сына
Супермадэль Сіндзі Кроўфард упершыню публічна выказалася пра смерць свайго сына Прэслі Гербера.
Прэслі Гербер, Кая Гербер, Сіндзі Кроўфард і Рэндзі Гербер. Фота: Gilbert Flores/WWD via Getty Image
27‑гадовы Гербер памёр 20 верасня ў рэабілітацыйным цэнтры ў Каліфорніі, піша Бі-бі-сі.
«Ён — мілая, цудоўная душа, якая любіла і якую любяць — цяпер і назаўжды», — напісала Сіндзі Кроўфард у Instagram, апублікаваўшы чорна-белы здымак сына.
«Мы так ганарымся тым, як ён пражыў сваё жыццё, — з дабрынёй і адкрытасцю».
Гербер памёр 20 верасня ў рэабілітацыйным цэнтры ў Каліфорніі. Паліцыя паведаміла, што ў якасці магчымай прычыны смерці расследуецца перадазіроўка.
Гербер быў мадэллю, як і яго маці, а таксама малодшая сястра Кая. Яго дэбют на подыуме адбыўся ва ўзросце 16 гадоў, калі ён узяў удзел у паказе італьянскага брэнда Moschino. Ён здымаўся ў рэкламе Calvin Klein і Dolce & Gabbana, а ў 2018 годзе разам з маці з'явіўся ў рэкламным роліку Pepsi. Яго бацька Рэндзі Гербер — бізнэсмен, які разам з Джорджам Клуні стаў сузаснавальнікам брэнда тэкілы Casamigos.
«Мы шчаслівыя, што Прэслі быў у нашым жыцці на працягу 27 гадоў, — напісала Кроўфард. — Мы ўдзячныя за вялізную любоў і падтрымку з боку такой колькасці людзей, якія ведаюць і любяць нашу сям'ю, а таксама незнаёмых людзей, якія падзяляюць наш боль».
«Да новай сустрэчы, наш мілы хлопчык. Мы будзем любіць цябе вечна— мама, тата і Кая», — дадала яна ў завяршэнне.
Сястра Гербера, Кая, у нядзелю таксама прысвяціла яму публікацыю. Яна выклала відэа, на якім яны з братам яшчэ дзецьмі танчаць разам, фатаграфію, дзе яны стаяць каля акіяна, а таксама чатырохстаронкавы ліст.
«Я вучуся любіць цябе, калі не магу цябе бачыць. Вучуся размаўляць з табой, не хапаючыся за тэлефон, каб патэлефанаваць. Вучуся быць тваёй сястрой у свеце, дзе я не магу да цябе дастукацца», — напісала яна.
Судова-медыцынская экспертыза акругі Лос-Анджэлес класіфікуе справу Гербера як такую, што патрабуе дадатковага расследавання. У той жа час паліцэйскае ўпраўленне горада Санта-Моніка заявіла, што няма ніякіх прыкмет таго, што смерць наступіла ў выніку злачынных дзеянняў.
У апошнія гады Гербер адкрыта расказваў пра свае праблемы з псіхічным здароўем і ўжыванне наркотыкаў, а таксама публікаваў у Instagram відэа, якія называў «Панядзелкі псіхічнага здароўя» (Mental Health Mondays).