У Літвы забралі этап Кубка свету за адмову дапусціць на яго беларусаў і расіян
Міжнародны саюз сучаснага пяцібор'я (UIPM) пазбавіў Літву права правесці этап Кубка свету. Спаборніцтвы павінны былі адбыцца ў Коўне з 13 па 17 красавіка 2027 года.
Фота ілюстрацыйнае
Прычынай рашэння сталі абмежаванні, якія дзейнічаюць у Літве ў дачыненні да беларускіх і расійскіх спартсменаў. Літоўскі бок па-ранейшаму адмаўляецца дапускаць іх да спаборніцтваў на тэрыторыі краіны.
Прэзідэнт Літоўскай федэрацыі сучаснага пяцібор'я Юсцінас Кіндэрыс заявіў, што спачатку гэтая навіна выклікала ў яго гнеў і расчараванне, бо падрыхтоўка ўжо пачалася і былі заключаныя дамовы з пастаўшчыкамі паслуг. Пры гэтым ён прызнаў, што ўвогуле такое развіццё падзей не стала нечаканасцю: кіраўніцтва UIPM неаднаразова пыталася ў літоўскага боку, як той плануе вырашаць пытанне ўдзелу расійскіх і беларускіх спартсменаў.
Кіндэрыс выказаў шкадаванне, што шматгадовы досвед Літвы ў арганізацыі чэмпіянатаў і заваяванні медалёў не атрымаў, на яго думку, належнага разумення. Ён адзначыў, што федэрацыя спадзявалася на больш паважлівае стаўленне да яе пазіцыі, але не сустрэла разумення.
Чытайце таксама:
Міжнародны саюз раварыстаў зняў абмежаванні з беларусаў
Міжнародная федэрацыя студэнцкага спорту зняла ўсе абмежаванні з беларусаў
Еўрапейская федэрацыя гімнастыкі зняла ўсе абмежаванні з беларускіх і расійскіх атлетаў
Яшчэ адна міжнародная федэрацыя зняла абмежаванні з беларусаў