Дзяржабвінаваўца па справе Андрэя Пачобута стаў суддзёй
34‑гадовага пракурора Дзяніса Корду прызначылі суддзёй суда Ленінскага раёна Гродна на пяць гадоў. Ён падтрымліваў абвінавачанне ў шэрагу палітычных спраў і знаходзіцца пад польскімі санкцыямі.
Корду прызначылі ўказам № 355, які Аляксандр Лукашэнка падпісаў 7 кастрычніка. На прызначэнне звярнуў увагу тэлеграм-канал «Право имеют».
Да гэтага Корда працаваў пракурорам аддзела пракуратуры Гродзенскай вобласці. Ён быў дзяржаўным абвінаваўцам у справе журналіста і актывіста Саюза палякаў Андрэя Пачобута. Таксама падтрымліваў абвінавачанне ў справах кіроўцы Сяргея Ціханоўскага, Аляксандра Арановіча і Аксаны Ляпко, якую пазней памілавалі.
У 2023 годзе Польшча ўнесла Корду ў санкцыйны спіс як датычнага да масавых парушэнняў правоў чалавека ў Беларусі. У абгрунтаванні польскія ўлады назвалі яго прыхільнікам рэжыму Лукашэнкі і заявілі, што яго ўезд і знаходжанне ў Польшчы ўяўляюць пагрозу дзяржаўнай бяспецы.
Андрэя Пачобута ў лютым 2023 года асудзілі на восем гадоў калоніі ўзмоцненага рэжыму. У красавіку 2026 года журналіста вызвалілі ў межах абмену зняволенымі паміж Беларуссю і Польшчай.