У Мінску больш не будзе камерцыйнага долевага будаўніцтва
Новыя пляцоўкі пад жыллё ў сталіцы выдзяляюць толькі камунальным прадпрыемствам. Камерцыйныя забудоўшчыкі завяршаюць раней узгодненыя праекты.
Навіну пра гэта паведаміла старшыня камітэта будаўніцтва і інвестыцый Мінгарвыканкама Ірына Гонтарава ў сюжэце «Першага інфармацыйнага», прысвечаным праблемам жылога комплексу «Смарт».
«Застаецца буйны «Паўночны бераг» і вось гэтыя адзінкавыя аб’екты, якія дабудоўваюць. Усё. Далей — толькі УКБ», — сказала яна.
Паводле Гонтаравай, у горадзе будуць завяршаць праекты, якія ўзгаднілі або пляцоўкі пад якія прадалі на аўкцыёнах чатыры-пяць гадоў таму.
Новыя ўчасткі атрымліваюць толькі камунальныя прадпрыемствы. Долевае будаўніцтва — калі людзі ўносяць грошы за будучыя кватэры яшчэ да завяршэння дома — пры гэтым застаецца.
Office Life яшчэ летась паведамляў пра спыненне продажу новых пляцовак пад забудову камерцыйным кампаніям у Мінску.