Адзіная сістэма аплаты праезду з'явіцца ва ўсіх гарадах краіны ў 2027 годзе
Будзе магчымасць аплачваць праезд не толькі шляхам кампаставання (валідацыі) талона, але і з дапамогай мабільнага дадатку або банкаўскай карткі.
Фота: Мінск-навіны
Зараз праводзяцца тэндарныя закупкі, і арганізацыі грамадскага транспарту набываюць неабходнае абсталяванне. Пра гэта расказаў журналістам начальнік упраўлення аўтамабільнага і гарадскога пасажырскага транспарту Мінтрансу Андрэй Гладкі, піша БелТА.
«У поўным аб'ёме такая сістэма працуе ў Мінску. У 2027 годзе яе ўкараніць ва ўсіх гарадах», — паведаміў ён.
Будзе прадугледжана магчымасць аплачваць праезд не толькі шляхам кампаставання талона, але і з дапамогай мабільнага дадатку або банкаўскай карткі.
Таксама ствараецца адзіная дзяржаўная сістэма продажу білетаў на прыгарадныя і міжгароднія пасажырскія перавозкі.
«З 1 лютага плануецца, што ўсе суб'екты змогуць уносіць даныя. Спачатку — аператары пасажырскіх перавозак і перавозчыкі», — растлумачыў Андрэй Гладкі.
Паводле яго слоў, цяпер пасажыру, каб выбраць аптымальны маршрут, даводзіцца звяртацца да некалькіх сэрвісаў.
«Аб'яднаем рэсурсы ў адну інфармацыйную сістэму. Пры гэтым праца спадарожных сістэм браніравання і продажу білетаў не забараняецца. Пасажыр зможа скарыстацца як існуючай інфармацыйнай сістэмай, так і платформай «Продаж білетаў». Інфармацыя будзе даступная пра ўсе рэйсы і свабодныя месцы», — дадаў Андрэй Гладкі.