Латвія ўвяла лабараторныя праверкі ўсіх грузаў беларускага збожжа
Служба дзяржаўных даходаў Латвіі з верасня правярае ўсе партыі збожжа, якія паступаюць з Расіі і Беларусі. Мэта праверак — высветліць, ці не вывозяць праз латвійскую тэрыторыю збожжа з акупаваных Расіяй украінскіх тэрыторый.
Здымак ілюстрацыйны. Фота: magnific.com
Пра гэта паведаміла генеральная дырэктарка службы Байба Шмітэ-Роке ў эфіры тэлеканала TV3. Паводле яе слоў, супрацоўнікі правяраюць дакументы, якія суправаджаюць кожны груз. Адначасова Харчова-ветэрынарная служба Латвіі адбірае ўзоры збожжа з транзітных партый і адпраўляе іх на лабараторныя даследаванні ў Францыю і Вялікабрытанію.
Экспертызы павінны дапамагчы вызначыць паходжанне збожжа і высветліць, ці было яно вырашчанае на акупаваных украінскіх тэрыторыях.
Калі даследаванні пацвердзяць украінскае паходжанне збожжа з акупаваных тэрыторый, інфармацыю перададуць атрымальнікам грузу. Акрамя таго, вынікі праверак могуць стаць падставай для абмежавання дзейнасці адпаведнага перавозчыка ў Латвіі. Не выключаецца і забарона на далейшы транзіт збожжа праз краіну.
Пры гэтым Байба Шмітэ-Роке не ўдакладніла, ці ўдалося ўжо выявіць партыі збожжа, паходжанне якіх звязанае з акупаванымі тэрыторыямі Украіны.
Нягледзячы на ўзмоцненыя праверкі, транзіт збожжа з Расіі і Беларусі праз Латвію істотна павялічыўся. За першыя дзевяць месяцаў 2026 года яго аб’ём быў у 2,7 раза большы, чым за аналагічны перыяд 2025 года. Абсалютныя аб’ёмы перавезенага збожжа не паведамляюцца.
Чытайце таксама:
Латвія ўвядзе мыта 300% на транзіт збожжа з Беларусі
Латвія падоўжыла забарону імпарту прадуктаў і кармоў з Беларусі