Памёр мастак-пастаноўшчык серыяла «Ліквідацыя» Аляксандр Кандратаў, арыштаваны ў Расіі па справе аб дзяржздрадзе
Яму было 52 гады.
Пра смерць 52‑гадовага Кандратава паведамляе расійскі праваабарончы праект «Першы аддзел».
Ён памёр у Боткінскай бальніцы ў Маскве, куды яго шпіталізавалі 23 кастрычніка са следчага ізалятара.
Справу супраць Кандратава завялі 5 жніўня. Яго адвакат Наталля Ціханава паведамляла, што следства палічыла дзяржаўнай здрадай «не менш за шэсць публікацый» у інтэрнэце. Пра што ў іх ішла гаворка, не ўдакладнялася.
Кандратаў нарадзіўся і вырас у Маскве, але з 2012 года жыў у Кіеве, дзе засталася яго сям’я. У Расію ён прыехаў, каб памяняць замежны пашпарт. Мастака затрымалі ў аэрапорце Унукава 5 мая.
Перад абвінавачаннем у дзяржаўнай здрадзе Кандратаў трапіў пад так званыя «карусельныя арышты» — агулам ён правёў у ізалятары больш за 70 сутак.