Чорны лабрадор Піксель вынюхаў кантрабанды на 7 тысяч еўра на польска-беларускай мяжы
Кожны з двух 21‑гадовых кантрабандыстаў аштрафаваны на 4 тысячы 700 еўра. Ім забаранілі ўезд у Шэнген на восем гадоў, паведамляе Беларуская рэдакцыя Польскага радыё.
Лабрадор Піксель побач са знойдзенай кантрабандай. Фота: Izba Administracji Skarbowej w Białymstoku
Супрацоўнікі Мытна-падатковай службы Польшчы на аўтапераходзе «Кузніца» (на беларускім баку — «Брузгі») знайшлі ў двух мікрааўтобусах маркі Volkswagen кантрабандныя цыгарэты з беларускімі акцызнымі маркамі.
1 500 пачкаў тытунёвых вырабаў на агульную суму больш за 31 тысячу злотых (7 тыс. еўра) удалося знайсці дзякуючы пільнаму лабрадору па мянушцы Піксель — службоваму сабаку польскай мытні. Цыгарэты былі схаваныя ў сядзеннях транспартных сродкаў, а кіроўцамі мікрааўтобусаў былі двое 21‑гадовых беларусаў.
Кантрабандысты скарысталіся магчымасцю добраахвотна пагадзіцца на пакаранне і прынялі штрафы 21 тысячы злотых (больш за 4 тыс. 700 еўра) кожны. На падставе рашэння польскіх памежных органаў ім забаронены ўезд у краіны Шэнгенскай зоны на восем гадоў.