У Горках п'янага бяспраўніка спынялі стрэламі
У Горках супрацоўнікі ДАІ выкарысталі зброю, каб спыніць п’янага кіроўцу, які не меў правоў на кіравання аўтамабілем, паведамляе прэс-служба МУС.
Скрыншот з відэа
Інспектары падалі сігнал аб спыненні аўтамабілю Citroen, але кіроўца праігнараваў патрабаванне і паспрабаваў уцячы. Падчас пагоні ён, як сцвярджаецца, ствараў рэальную пагрозу для іншых удзельнікаў дарожнага руху.
Пасля неаднаразовых папярэджанняў інспектар прыцэльна стрэліў па колах аўтамабіля, у выніку чаго той спыніўся.
За рулём знаходзіўся 36‑гадовы жыхар вёскі Сялец Горацкага раёна. У яго былі відавочныя прыкметы алкагольнага ап’янення. Медыцынскі агляд паказаў 1,57 праміле алкаголю. Раней мужчыну ўжо пазбавілі права кіравання за язду ў нецвярозым стане.
У дачыненні да яго склалі чатыры адміністрацыйныя пратаколы. Мужчыну змясцілі ў ізалятар часовага ўтрымання, а аўтамабіль адправілі на стаянку пад аховай.