РПЦ арганізавала аблёт месцаў расійскіх паражэнняў з мошчамі Георгія Пераможца

Святары Рускай праваслаўнай царквы (РПЦ) арганізавалі над Данбасам «паветраны хрэсны ход» з мошчамі святога Георгія Пераможца. Пра гэта паведаміў вайсковы аддзел Маскоўскага патрыярхату, піша The Moscow Times.

Фота: t.me/voennyotdel

Святары абляцелі на вайсковым верталёце ўчасткі фронту, дзе ваюе расійская групоўка «Захад». У прыватнасці, яны наведалі Купянскі і Ліманскі кірункі, на якіх расійская армія восенню пацярпела буйное паражэнне.

Паводле ацэнак амерыканскага Інстытута вывучэння вайны (ISW), у верасні і за першыя тры тыдні кастрычніка расійскія войскі страцілі кантроль над тэрыторыяй плошчай 241 квадратны кіламетр. Яны таксама страцілі выступ каля Лімана і апынуліся пад пагрозай акружэння падчас наступлення на Славянск.

У РПЦ заявілі, што расійскія вайскоўцы на фронце выконваюць сваю цяжкую працу, ведаючы пра малітоўную падтрымку і заступніцтва святых. Прадстаўнікі гэтай Царквы таксама адзначылі, што традыцыя асвячаць межы краіны рэлігійнымі святынямі існуе ўжо шмат стагоддзяў.

Відэа з верталётнага аблёту суправаджаецца песняй на словы святара Георгія Дзехцярова. У ёй сярод іншага ёсць словы: «Мы молимся в небе над выжженной стынью, чтоб вера была нашей силой в войне» і «Пусть дроны и копья закроют зенит, но с нами творец, мы стеною стоим».

Гэта не першая падобная ініцыятыва РПЦ. У верасні царква пачала перавозіць на фронт мошчы маскоўскага князя Дзмітрыя Данскога. Пра іх знаходжанне афіцыйна абвясцілі месяцам раней. Рэліквіі, у прыватнасці, даставілі ў храм на мемарыяльным комплексе «Савур-Магіла» на тэрыторыі самаабвешчанай «ДНР».

Тады ў РПЦ заклікалі маліцца за ўмацаванне Расіі, мужнасць і духоўную стойкасць яе вайскоўцаў, а таксама за Божую дапамогу расійскай арміі.

Пазней расійскія Z-каналы паведамілі, што падчас адступлення ў раёне Лімана расійскія вайскоўцы маглі страціць частку мошчаў Дзмітрыя Данскога.

Каментары да артыкула