«Негр вырашае, як паводзіць сябе карэнным беларусам?» Былая палітзняволеная Вішняк наехала на Алану Гебрэмарыям
Вішняк пераконвае, што яе выказванні тычацца выключна палітычных разыходжанняў. Але, тлумачачы сваю пазіцыю, зноў вяртаецца да тэмы расы і этнічнага паходжання.
Скандал пачаўся з серыі скрыншотаў са сторыс Ганны Вішняк у інстаграме, якія хутка разышліся па сацсетках. На апублікаваных кадрах актывістка размясціла эмацыйныя тэкставыя допісы з нецэнзурнай лаянкай і абразамі ў адрас былой палітзняволенай Аланы Гебрэмарыям. У сторыс у інстаграме Вішняк у грубай форме абураецца тым, што цемнаскурая дзяўчына «вырашае, як паводзіць сябе карэнным беларусам», і патрабуе выключыць яе з дэмакратычнага руху.
Сторыс Ганны Вішняк у Інстаграме
Свае думкі яна раскрыла падрабязней у фэйсбуку. Там яна скардзіцца на прысутнасць людзей эфіопскага паходжання ў беларускай дыпламатыі, протапарламенце і дыскусіях пра нацыянальную ідэнтычнасць.
Допіс Ганны Вішняк з фэйсбука
У размове з журналістам «Нашай Нівы» Ганна Вішняк сказала, што ў яе «не было ніякага канфлікту ні з кім», а яе выказванні тычацца выключна палітычных разыходжанняў.
Тым не менш, тлумачачы сваю пазіцыю, яна зноў звярнулася да расісцкіх выказванняў.
«Мы ўсе добра разумеем, як выглядае этнічны беларус», — даводзіць Вішняк. Яе абурае, што чалавек, які візуальна «зусім не выглядае як карэнны беларус», прасоўвае чужыя для краіны наратывы.
Вішняк катэгарычна выступае супраць любых кампрамісаў з лукашэнкаўцамі, назваўшы сваіх апанентаў — у прыватнасці, Алану Гебрэмарыям, Марыю Калеснікаву, Таццяну Хоміч, а таксама Івана Краўцова — «лабістамі Лукашэнкі».
Яна перакананая, што беларусы ўнутры краіны выступаюць супраць перамоў і саступак рэжыму, але вымушаныя маўчаць праз рэпрэсіі, таму сама яна лічыць сваім правам гаварыць рэзка і без аглядкі на абмежаванні.
Напрыканцы размовы Вішняк супрацьпаставіла пазіцыю Гебрэмарыям сваім уласным прынцыпам, а таксама поглядам некаторых былых палітзняволеных. Яна падкрэсліла, што для іх заўсёды існавала выразная формула: «Лукашэнка — гэта вораг, а Крым — гэта Украіна». Актывістка паставіла пад сумнеў і праўкраінскую пазіцыю Гебрэмарыям.
Ахарактарызаваўшы лінію сваёй апаненткі як «прарасійскую», Вішняк падсумавала, што «людзям з такімі поглядамі няма месца ў беларускай дэмакратычнай супольнасці».
У адказ Алана Гебрэмарыям напісала, што будзе збіраць выпадкі тых, каму «нашкодзіла Ганна Вішняк».
Скрыншот сторыс Аланы Гебрэмарыям
Алана Гебрэмарыям патлумачыла «Нашай Ніве», што расісцкія выпады сталі толькі апошняй кропляй, а сапраўдная праблема значна глыбейшая.
Паводле яе слоў, яшчэ падчас зняволення ў гомельскай жаночай калоніі №4 Вішняк сутыкала ілбамі палітзняволеных жанчын, правакавала канфлікты, наўмысна парушала правілы ўнутранага распарадку, падстаўляючы іншых, і распаўсюджвала чуткі пра тое, што Гебрэмарыям ды іншыя нібыта супрацоўнічаюць з адміністрацыяй або «не да канца патрыёты».
Пасля выхаду на волю і ад'езду ў эміграцыю цкаванне працягнулася. Гебрэмарыям распавяла, што Вішняк нават склала дакумент з выдуманымі «характарыстыкамі» на розных былых палітзняволеных жанчын і абвінавачаннямі іх у працы на аператыўнікаў, які пасля скінула ў чат сваякоў палітвязняў, чым шакавала бацькоў.
Акрамя таго, паводле слоў Аланы, Вішняк прыходзіла на закрытыя мерапрыемствы дэмсілаў, дзе падыходзіла да калег Гебрэмарыям і пераконвала іх, што тая нібыта супрацоўнічала з рэжымам. Таксама былі выпадкі пагроз іншым людзям, у тым ліку ад мужчын, якія дзейнічалі ад імя Ганны.
Гебрэмарыям падкрэслівае, што асцерагаецца за ўласную бяспеку і бяспеку іншых жанчын, бо лічыць, што Вішняк здольная перайсці ад пагроз да фізічнай расправы. Да падачы калектыўнай заявы ў паліцыю ўжо гатовыя далучыцца і іншыя пацярпелыя, з якімі Алана збірае доказы — скрыншоты ды галасавыя паведамленні.
Таксама актывістка чакае ад лідараў дэмакратычных сіл не проста агульнага асуджэння ксенафобіі, а поўнай забароны для Ганны Вішняк на ўдзел у любых мерапрыемствах і канферэнцыях дэмакратычнай супольнасці, бо раней непублічныя скаргі палітзняволеных у структуры заставаліся без адказу.
На скандал адрэагавала і Святлана Ціханоўская. У каментары «Люстэрку» яна сказала, што «гэты выпадак можа выклікаць толькі расчараванне і асуджэнне».
«Усе мы можам быць у чымсьці рознымі, але гэта не перашкаджае нам быць беларусамі. Вельмі дзіўна чуць пра такое», — падсумавала лідарка дэмакратычных сіл.